Dźmitryj Miadźviedzieŭ nazvaŭ dziŭnymi vykazvańni Łukašenki pra «čužyja» dla Biełarusi vojny
Premjer Rasii Dźmitryj Miadźviedzieŭ zajaviŭ, što jamu dziŭna čuć vykazvańni, padobnyja zajavie Alaksandra Łukašenki pra toje, što jaho krainu ŭciahvali ŭ roznyja vojny, nahadaŭšy, što ŭ hetych kanfliktach ahulnyja prodki baranili svaju ziamlu ad intervientaŭ, paviedamlaje Interfaks.
«My ni ŭ jakim razie nie pavinny kidać choć niejki cień na podźvih našych prodkaŭ, jakija abaraniali svaju ziamlu. Jany žyli na terytoryi sučasnaj Rasii abo Biełarusi, ale abaraniali svaju ziamlu ad zachopnikaŭ», — skazaŭ jon na pres-kanfierencyi pa vynikach svajho ŭdziełu ŭ dziełavym inviestycyjnym samicie ASIEAN i ŭschodnieazijackim samicie.
Pa słovach kiraŭnika rasijskaha ŭrada, tak było i ŭ 1812 hodzie, tak było i ŭ hady Pieršaj suśvietnaj i Vialikaj Ajčynnaj vajny.
«Našy baćki i dziady abaraniali svaju ziamlu. Heta nie ŭdzieł u čužych vojnach. Tamu dla mianie vielmi dziŭna čuć takija słovy», — dadaŭ premjer RF.
Tak Miadźviedzieŭ pa prośbie žurnalistaŭ prakamientavaŭ adpaviednaje vykazvańnie Łukašenki.
Raniej u intervju kazachstanskamu telekanału «Chabar», kažučy pra Vajnu 1812 hoda, Pieršuju suśvietnuju i Druhuju suśvietnuju, Łukašenka zajaviŭ: «Heta nie našy byli vojny». Jon mieŭ na ŭvazie, što nie biełarusy ich raźviazvali.
Ciapier čytajuć
«Čamu ja pavinien dakazvać, što nie darmajed?» Pradprymalnika z Homiela pamyłkova zapisali ŭ niezaniatyja — jon daviedaŭsia tolki paśla vializnych rachunkaŭ za kamunałku14
Kamientary