Piotra Rudkoŭski: Lepš by vybaraŭ nie było ŭvohule. Lepš sumlennaja aŭtakratyja, čym fikcyjnaja demakratyja

Palityčnyja sistemy byvajuć roznyja. Byvajuć demakratyi, byvajuć aŭtakratyi, napisaŭ u siabie ŭ fejsbuku dyrektar BISS, doktar fiłasofii Piotra Rudkoŭski. Kali vybirać pamiž pieršym i druhim, lepš pieršaje. Ale kali pa niejkich pryčynach kamuś zachaciełasia mieć druhoje… škada, kaniešnie, ale chaj tak.

Adnak, na miłaść boskuju, nie treba zajmacca fikcyjami, tavaryšy! Nu, chočacie vy farmavać Pałatu pradstaŭnikoŭ biez naŭprostaha ŭdziełu hramadstva. Dyk farmujcie. Ale BIEZ IMITACYJAŬ. Chaj pradstaŭnictva Administracyi prezidenta, Rady biaśpieki, ideałahičnaj viertykali źbirajecca i pryznačaje 110 čałaviek. Tak, heta budzie niedemakratyčna. Zatoje sumlenna.

Nazirajučy za psieŭdavybarčym pracesam, ja spaznaŭ vuścišnaje dežaviu. Adčuvańni takija ž samyja, jak tady, kali ja sa svaim kaleham pravodzili daśledavańnie pa płahijacie. Ahulny nazoŭnik dla pieršaha i druhoha — sistemnaje marnatraŭstva. Finansavych srodkaŭ — heta raz. Časavych resursaŭ — dva. Čałaviečych resursaŭ — try.

Piśmovyja pracy — heta vydatny navučalny mietad. Ale kali asnoŭnym sposabam ich pradukcyi jość płahijat, to lepš chaj ich nie budzie ŭvohule. Vybary — heta vydatny sposab vyjaŭleńnia intaresaŭ hramadstva. Ale kali vybary voś užo dvaccać piaty hod zvodziacca da elektaralnaha płahijatu, to… tak, ja sapraŭdy liču, što tady lepš skasavać instytut vybaraŭ uvohule.

Fikcyjnyja vybary nie vytrymlivajuć nijakaha testu vyhadaŭ i zatrat. Aproč pamianionych vyšej zatrat jość samaja vialikaja zatrata: strata pačućcia rečaisnaści pradstaŭnikami ŭładnych struktur.

Heta było vyrazna bačna na prykładzie intervju Davydźki dla Jeŭraradyjo. Dla hetaha čałavieka ŭžo nie isnuje praŭda i falš, realnaje i fikcyjnaje. Isnuje tolki baraćba plamionaŭ.

Prytupleńnie zdolnaści adroźnivać praŭdu i falš, jak praviła, doraha abychodzicca. Kali heta zdolnaść prytuplajecca ŭ dvuch-troch pradstaŭnikoŭ sistemy, asablivaj pahrozy dla sistemy niama. Ale kali ŭ imitacyju ŭciahnienyja dziasiatki tysiač pradstaŭnikoŭ sistemy, a jašče sotni tysiač stanoviacca niepasrednymi śviedkami, to heta ŭžo sistema-z-rakavaj-puchlinaj.

Kaliś, u 16-m stahodździ, siarod katalickich teołahaŭ była sprečka: ci niechryścijanski vaładar moža być dobrym vaładarom. Vielmi zapomniłasia vykazvańnie adnaho teołaha: «Lepš razumny turak (=musulmanin), čym durny chryścijanin». Niešta padobnaje i tut: lepš sumlennaja aŭtakratyja, čym fikcyjnaja demakratyja.

• 0
• 0
• 0
• 0
• 0
• 0
• 0
• 0