«Jany adkažuć praz sud»: Marzaluk rychtuje pazovy da svaich kryŭdzicielaŭ siarod ŚMI
Deputat Pałaty pradstaŭnikoŭ Ihar Marzaluk rychtuje pazovy ŭ sud na ŚMI i kamientataraŭ u internecie. Jon źbirajecca pryzvać da adkaznaści tyja vydańni i ludziej, što dapuskali padčas vybaraŭ abrazy ŭ adras deputata i jaho davieranych asob, piša Jeŭraradyjo.
«Za kožnuju abrazu, za kožnuju falsifikacyju i skažeńnie źmiestu tekstaŭ. Abrazy ludziej: maich davieranych asob, mianie asabista. Jany ŭsie adkažuć, adkažuć praz sud. Jany ž ličać, što internet — heta ściana, na jakoj jany mohuć pisać. Ja i tut płanuju być pieršaprachodcam. Kali idzie abraza ludziej, vykarystańnie błatnoj fieni, hiebielskija mietodyki rasčałaviečvańnia. Chaj jany rasčałaviečvajuć siabie i na svaich placoŭkach. — aburajecca deputat. — I jany nazyvajuć siabie nośbitami jeŭrapiejskich kaštoŭnaściaŭ? Talerancyja — heta kali tabie mohuć nie padabacca pohlady inšaha čałavieka, ty možaš ź im nie pahadžacca, ale nie pierachodziš na asoby. Ty nie ździekuješsia z proźvišča. Nie pišaš podłaści pra siamju. Nie pluješ u čałavieka. I nie ŭžyvaješ błatny žarhon».
Adnaznačna siarod ŚMI, na jakich Ihar Marzaluk pakryŭdziŭsia, — heta telekanał «Biełsat», jaki vielmi ščylna sačyŭ za pieradvybarčaj kampanijaj deputata: «Kali maich davieranych asob nazyvali łysymi mužykami. Kali ŭ vusny dyrektara škoły ŭkładali słovy, što «na maim učastku pieramoža Marzaluk», a jana hetaha nie kazała. Kali majo proźvišča kavierkali. Nakont taho, chto kaho lubić ci nienavidzić, budziem raźbiracca ŭ sudach», — zajaviŭ deputat.
Na pytańni ab tym, jakim ŚMI rychtavacca da suda, Ihar Marzaluk, užo sychodziačy ŭ zału pasiadžeńniaŭ, zapeŭniŭ, što jon potym usie pieraličyć.
Kamientary