Cana nafty moža ŭźlacieć da niabios, paśla taho jak amierykancy rakietnym udaram zabili iranskaha kamandujučaha
Pientahon paćvierdziŭ, što rakietny ŭdar, u vyniku jakoha byŭ zabity kamandujučy siłami śpiecyjalnaha pryznačeńnia «Al-Kuds» Korpusa vartavych isłamskaj revalucyi (elitnyja siły US Irana) Kasem Sulejmani, byŭ ździejśnieny pa rasparadžeńni prezidenta ZŠA Donalda Trampa. Pra heta havorycca ŭ apublikavanaj u čaćvier zajavie pres-słužby amierykanskaha vajskovaha viedamstva.
«Pa rasparadžeńni prezidenta siły ZŠA pačali rašučaje dziejańnie abarončaha charaktaru, kab abaranić asabovy skład ZŠA za miažoj, zabiŭšy Kasema Sulejmani — kiraŭnika sił «Al-Kuds» Korpusa vartavych isłamskaj revalucyi, uniesienych ZŠA ŭ śpis zamiežnych terarystyčnych arhanizacyj», — padkreślivajecca ŭ dakumiencie.
«Hienierał Sulejmani aktyŭna pracavaŭ nad płanami napadu na amierykanskich dypłamataŭ i vajskoŭcaŭ u Iraku i inšych krainach rehijonu», — śćviardžaje Pientahon.
«Sulejmani taksama ŭchvaliŭ napad na ambasadu ZŠA ŭ Bahdadzie, jaki mieŭ miesca na hetym tydni», — zajavili ŭ pres-słužbie. «Hety ŭdar byŭ nakiravany na strymlivańnie budučych płanaŭ napadaŭ z boku Irana», — dadali ŭ vajskovym viedamstvie.
Raniej telekanał Sky News Arabia paviedamiŭ, što ŭ vyniku rakietnaha ŭdaru ŭ rajonie aeraporta Bahdada byli zabityja Sulejmani i namieśnik kiraŭnika irakskaha šyickaha apałčeńnia Abu Machdzi al-Muchandzis. Vysokapastaŭlenyja vajskoŭcy znachodzilisia ŭ kałonie aŭtamabilaŭ.
Paviedamlajecca, što ŭ aŭtamabil z Sulejmani i Muchandzisam udaryli dźvie rakiety, jašče adna — u mašynu ź ich achovaj.
Bataljon «Al-Kuds» — adna z najbolš bajazdolnych častak KVIR, jakaja aktyŭna ŭdzielničaje ŭ vajennych kanfliktach u Siryi i Iraku. Ličycca, što efiektyŭnaść śpiecpadraździaleńnia šmat u čym vyznačałasia zdolnaściami jaho kamandujučaha — hienierała Kasema Sulejmani. Pradstaŭniki administracyi ZŠA raniej zajaŭlali, što ličać Sulejmani terarystam.
Źniščeńnie Sulejmani stała adkazam na ataku na pasolstva ZŠA ŭ Bahdadzie. 1 studzienia amierykanskija vajennyja ŭžyli ślozatačyvy haz, kab razahnać demanstrantaŭ, jakija, jak paviedamlaje telekanał Al Arabiya, sprabavali padpalić dach budynka. Dziaržsakratar Majkł Pampiea zajaviŭ, što za arhanizacyjaj napadu na pasolstva staić Iran.
Adrazu paśla naviny pra źniščeńnie Sulejmani padskočyli ceny na naftu. Košt fjučarsa na naftu marki Brent vyras na 2,84% — da $ 68,13, śviedčać źviestki tarhoŭ Łondanskaj mižkantynientalnaj biržy ICE.
Kali Iran adkaža ŭdaram na ŭdar i adbudziecca eskałacyja kanfliktu, nafta padaražeje jašče bolš.
Biaspałaŭ kančatkova rassvaryŭsia ź Cichanoŭskim: Dla jaho dobry tolki adzin čałaviek — Prakopjeŭ55
Kamientary