Kitajski ekśpiert: Jeŭropie moža spatrebicca 2 hady, kab pieramahčy karanavirus
Kitajski ekśpiert pa infiekcyjnych zachvorvańniach ličyć, što Jeŭropie treba zabycca, što pandemija Covid-19 chutka skončycca, i padrychtavacca da bitvy, jakaja moža doŭžycca da 2 hadoŭ. Takim prahnozam staršynia kliničnaj ekśpiertnaj hrupy Šanchaja Covid-19 Čžan Veńchonh padzialiŭsia na videakanfierencyi, arhanizavanaj konsulstvam Kitaja ŭ Dziuseldorfie, pieradaje «South China Morning Post».
«Heta budzie narmalna, kali virus pryjdzie i sydzie — i budzie doŭžycca adzin-dva hady… Mahu vam skazać: zabudźciesia, što ŭ najbližejšy čas pandemija ŭ Jeŭropie skončycca.
Kab likvidavać hetuju ŭspyšku za karotki pramiežak času, miery pavinny być vielmi radykalnymi. Kali ŭvieś śviet zmoža pierastać ruchacca na praciahu čatyroch tydniaŭ, pandemija moža być spynienaja. Ale ja nie mahu sabie ŭjavić poŭnaje hłabalnaje spynieńnie. Navat u Niamieččynie ci Jeŭropie», — zajaviŭ infiekcyjanist.
Čžan Veńchonh, jaki taksama źjaŭlajecca dyrektaram adździeła infiekcyjnych chvarob univiersiteckaj balnicy Chuašań Fudan u Šanchai, zajaviŭ, što Kitaju ŭdałosia zakryć harady paŭsiudna, bo pieršaja ŭspyška supała z navahodniaj nočču, kali škoły i pradpryjemstvy ŭsio roŭna musili zakrycca.
Raniej jon prahnazavaŭ, što epidemija ŭ Kitai nabudzie pik pamiž krasavikom i červieniem, a potym adstupić letam, pieryjadyčna paŭtarajučysia na praciahu vosieni i zimy — i pik nadydzie nastupnaj viasnoj, choć i ŭ mienšym maštabie.
Ale pakolki epidemija stała pandemijaj, jana niepaźbiežna budzie doŭhaj, i kali jana moža być uziata pad kantrol — hetym letam ci nastupnym, — budzie zaležać ad hłabalnych namahańniaŭ pa jaje spynieńni, skazaŭ kitajski ekśpiert.
Na jaho dumku, biez adnačasovych dziejańniaŭ va ŭsim śviecie, tyja krainy, jakija ŭvodziać žorstkija miery, usio jašče buduć ryzykavać zaviezienymi infiekcyjami, jak heta adbyvajecca ŭ Kitai.
Čžan Veńchonh miarkuje, što pa miery raspaŭsiudžvańnia chvaroby i pavieličeńnia kolkaści zahinułych, urady mohuć źmianić svaje stratehii i bolš žorstka izalavać ludziej. Na jaho dumku, kali stratehii ŭsich krain stanoviacca bolš aktyŭnymi, «efiektyŭny kantrol nad pandemijaj — tolki pytańnie času».
Ciapier čytajuć
Vychadcy z «Alfa» KDB Biełarusi zajmajuć kiraŭničyja pasady ŭ novym rasijskim supiersakretnym śpiecpadraździaleńni, pryznačanym dla zabojstvaŭ za miažoju18
Kamientary