«Stała drenna na pracy — vyjšaŭ, a praz hadzinu znajšli miortvym». U Lidzie pamior 43-hadovy reanimatołah

43-hadovy doktar Lidskaj centralnaj rajonnaj balnicy pamior u noč ź niadzieli na paniadziełak. Jak raspaviadaje jaho kaleha, usio zdaryłasia na pracy, mužčynu stała drenna, jon vyjšaŭ. Kali nie viarnuŭsia, kalehi stali jaho šukać — znajšli niežyvoje cieła. Apošnim časam doktar pracavaŭ u reanimacyi, dzie lažać pacyjenty z COVID-19, paviedamlaje Tut.by.

— Siońnia nočču ŭ našaj balnicy pamior doktar-reanimatołah, małady mužčyna, 43 hady. Nočču padčas źmieny jamu stała drenna, vyjšaŭ, a kali kalehi praz hadzinu stali šukać, znajšli miortvym u raspranalni. Jon pracavaŭ u kovidnaj reanimacyi pa źmienach, 6 hadzin adpracavaŭ dniom, potym stolki ž adpačyvaŭ i znoŭ viarnuŭsia ŭ adździaleńnie, — raspaviadaje TUT.BY supracoŭnik Lidskaj centralnaj rajonnaj balnicy, jaki zachacieŭ zastacca ananimnym.

Pa słovach surazmoŭcy, reanimacyja, dzie lažać pacyjenty z COVID-19, adkryłasia 17 krasavika. Da hetaha chvoryja z dyjahnazam «karanavirus» byli, ale znachodzilisia ŭ inšym pamiaškańni. Kolki ŭsiaho pacyjentaŭ z COVID-19, supracoŭnik kliniki nie viedaje. Hetuju infarmacyju nie abnarodujuć navat dla daktaroŭ.

— Nichto nie daje nijakaj infarmacyi. Viedaju, u nas u paliklinicy byŭ pacyjent, jakoha prymali daktary, miedsiostry, paźniej u jaho paćvierdziŭsia karanavirus. Ci adpravili miedycynski piersanał na karancin, nie viedaju, usie maŭčać, tamu ciažka sudzić, — praciahvaje supracoŭnik balnicy. — Infiekcyjnaje adździaleńnie zapoŭniena, było niekalki ciažkich pacyjentaŭ u reanimacyi. Byli i tyja, chto lažaŭ u terapii, potym paćviardžaŭsia analiz, i ich pieravodzili ŭ infiekcyjnaje. Razumiejecie, u nas ciapier niama płaniorak, niama nijakaj infarmacyi, usie siadziać u svaim adździaleńni, časam pa elektronnaj pošcie dasyłajecca zahad Ministerstva achovy zdaroŭja.

Jak adznačaje supracoŭnik Lidskaj centralnaj rajonnaj balnicy, całkam srodkami indyvidualnaj abarony ŭkamplektavany pulmanałohija i reanimacyja z pacyjentami, u jakich paćvierdžany COVID-19. Ale ŭ inšych adździaleńniach, pavodle słovaŭ krynicy, całkam inšaja situacyja:

— Napeŭna, na składzie ŭsio jość, u nas ža niama masak na kožny dzień, chodzim u marlevych. Pakul u rehijonie ničoha nie zdaryłasia, humanitarnaja dapamoha nie dajazdžaje, jak, naprykład, u Minsk, Viciebsk, Homiel. Ciapier u nas jość marlevyja maski, jašče vydali ŭ vyhladzie prakładak ź sinteponu z vatavym płastom, ich nadziavajem tolki ŭ reanimacyju, a tak pracujem u marlevych maskach, adnarazovych kaŭpakach. Palčatak dastatkova, taksama apranajem miedycynski fartuch i narukaŭniki. Havorka pra toje, što inšym adździaleńniach nie ŭzmacnili abaronu, niekatoryja myjuć maski i sušać na batarei.

Na sajcie miascovaj balnicy źjavilisia spačuvańni ŭ suviazi sa śmierciu doktara.

«Uvieś kalektyŭ ustanovy achovy zdaroŭja «Lidskaja centralnaja rajonnaja balnica» smutkuje ŭ suviazi z raptoŭnym zychodam z žyćcia doktara-reanimatołaha S., śmierć jakoha nastupiła nočču, 20 krasavika, u internacie, stvoranym dla časovaha pražyvańnia miedycynskich rabotnikaŭ. Pavodle papiaredniaj infarmacyi, pryčynaj śmierci źjaviłasia vostraja karanarnaja niedastatkovaść. Vykazvajem słovy spačuvańnia blizkim i rodnym z nahody hora, jakoje zdaryłasia ź imi», — paviedamlajecca na sajcie miascovaj balnicy.

— Lidskim rajonnym adździełam SK pa hetym fakcie pravodzicca pravierka, pryznačana sudova-miedycynskaja ekśpiertyza. Usie abstaviny zdareńnia vyjaŭlajucca, — prakamientavała TUT.BY Ina Paźniak, aficyjny pradstaŭnik USK pa Hrodzienskaj vobłaści.

• 0
• 0
• 0
• 0
• 0
• 0
• 0
• 0