«Muž byŭ u reanimacyi, nikoli tak ciažka nie chvareŭ». Maładaja maci piaci dziaciej raskazała, jak jany ŭsioj siamjoj pieranieśli karanavirus
Alena Hryncievič z Hrodna — maci piaci dziaciej. U balnicu z karanavirusam jany patrapili ŭsioj siamjoj. Muž amal tydzień pravioŭ u reanimacyi, a sama žančyna paśla chvaroby stała donaram płazmy. Jana padzialiłasia svajoj historyjaj — pra simptomy, balničny byt i adnaŭleńnie paśla virusa, jaki navat 30-hadovymi moža ciažka pieranosicca.
«Kidała ŭ choład, myšcy vykručvała, baluča było navat hladzieć napierad»
Pieršym zachvareŭ muž. Heta było 2 krasavika. Spačatku lohkaje niedamahańnie i časty suchi kašal. U nastupnyja dni dadałasia łamota ŭ myšcach i słabaść, pot liŭsia ručajom, baleli vočy. Tempieratura padskokvała da 38,5-39,5 hradusa — paracetamoł jaje amal nie źbivaŭ. Mužčyna źviartaŭsia da doktara — analizy i renthien lohkich idealnyja. Ale balničny vydali.
5 krasavika padobnyja simptomy źjavilisia i ŭ Aleny.
«Pačała baleć śpina, kidała ŭ choład. Paśla dadaŭsia myšačny bol pa ŭsim ciele. Sustavy, kostki, myšcy vykručvała, jak pry hrypie. Hraduśnik pakazvaŭ 37,3. Mocna baleli vočnyja jabłyki (tak, što baluča było navat hladzieć napierad) i hałava (amal pastajanna, zvyčajnyja abiazbolvajučyja nie dapamahali).
Baleła horła. Tempieratura pavyšałasia dva dni. Ja jaje źbivała, bo adčuvała siabie jak nikoli žachliva», — apisvaje svoj stan žančyna.
Paśla chvareć pačali dzieci. Ale ŭ davoli lohkaj formie. Simptomy trymalisia tolki paru dzion — łamała ŭ ciele, baleła hałava i horła. U niekatorych navat tempieratury nie było.
«Zvyčajna ŭsie našy dzieci chvarejuć pa kole, tamu mianie heta asabliva nie ździviła. Da piedyjatra nie źviartalisia — nie bačyła nieabchodnaści. Dzieci šmat pili, pałaskali horła. Pastajanna pravietryvali pamiaškańnie», — dzielicca maci.
Jana dumała, što sprava ŭ zvyčajnym hrypie, ale na ŭsiaki vypadak samaizalavałasia ź siamjoj.
Zdavałasia, i ŭ muža chvaroba zacichła, jon staŭ adčuvać siabie lepš. A potym simptomy ŭzmacnilisia. Na pryjomie doktar pasłuchaŭ lohkija — čysta. Naściarožyła čyrvonaje horła, padumali, što anhina — karcina była padobnaja.
Adnak na nastupny dzień, 10 krasavika, mužu stała istotna horš — taja ž vysokaja tempieratura, jakaja źbivałasia tolki na paru hadzin, kašal, słabaść. Siamja vyrašyła, što ciahnuć nielha. Mužčynu zabrali ŭ balnicu, adrazu zrabili analizy i ŭziali mazok na «karonu».
«Praź niekatory čas jon telefanuje i kaža, što jaho kładuć u reanimacyju. Dvuchbakovaja pnieŭmanija siaredniaj ciažkaści. Karonnaja pnieŭmanija časta paražaje dva lohkija ŭ roznych siehmientach — tak było i ŭ jaho», — raskazvaje Alena.
Mužčyna pravioŭ u reanimacyi piać dzion.
«Jon byŭ biez telefona — zabrali, nielha. Infarmacyju pra stan daviedvalisia na poście. Uvieś dzień lažyš pad koŭdraj biez adzieńnia, ustavać nielha, atrymlivaješ lačeńnie. Ja telefanavała ŭ balnicu i prasiła pieradać, što ŭ mianie i dziaciej usio dobra. Ad biezvychodnaści pisała mužu ŭ vajbiery, jak u nas spravy, choć viedała, što nie adkaža, ale tak było lahčej», — uspaminaje Alena.
Pieradačy mužu jana prasiła advozić susiedziaŭ ci siabroŭ. Varyła sup, składała posud u pakiet, zalivała jaho antysieptykam i vystaŭlała na leśvičnuju placoŭku — kab minimizavać kantakty.
15 krasavika pryjšoŭ stanoŭčy vynik testu na karanavirus. Mužčynu pieraviali ŭ zvyčajnuju pałatu (paŭtorny renthien pakazaŭ, što pnieŭmanija rassmoktvajecca, arhanizm adrazu adreahavaŭ na lačeńnie) i praciahnuli terapiju — dva antybijotyki ŭvodzili praz kropielnicu.
Praz dva dni da jaho ŭ pałatu pierajechała siamja — va ŭsich, aproč adnaho dziciaci, paćvierdziłasia «karona».
«Ale dumaju, što jon taksama chvareŭ. Jon płyviec, imunitet dobra pracuje. Napeŭna, virus chutka pakinuŭ jaho», — sprabuje znajści tłumačeńnie Alena.
«Naš boks byŭ vialiki, z asobnym vannym pakojem»
Siamja lažała ŭ Hrodzienskaj abłasnoj infiekcyjnaj kliničnaj balnicy.
«Naš boks byŭ dastatkova vialiki, z asobnym vannym pakojem. Ranica pačynałasia ŭ 6:30 z vymiareńnia tempieratury i kisłarodu. Tempieraturu treba było mierać kožnyja try hadziny, kisłarod praviarali 2-3 razy na sutki. Taksama ranicaj brali analizy ź vieny», — raskazvaje pra balničnyja budni Alena.
Karmili 4 razy. U racyjonie — kašy, supy, bulba, miasa, tvaroh, kisiali. Ježu stavili ŭ śpiecyjalnyja šafki, jakija znachodziacca nie ŭ samim boksie, a ŭ «pryłaźniku». Šafka adčyniajecca z dvuch bakoŭ, kab miedpiersanał i pacyjenty mahli nie kantaktavać napramuju. Usia ježa ŭ adnarazovym posudzie.
«Za miežy boksa vychodzić nielha. Kali niešta treba, kala stała jość radyjosuviaź. Taksama kala dvuch łožkaŭ byli tryvožnyja knopki — sihnał razdasca na poście i pryjdzie miedsiastra, — dzielicca žančyna. — Na kalidory amal zaŭsiody pracavaŭ kvarc, u boksie jaho ŭklučali na niekalki hadzin. Sanitarak my amal nie bačyli — ja adrazu skazała, što padłohu budu myć sama niekalki razoŭ na dzień. Dy i navošta im u hetych kaściumach parycca? Tolki śmiećcie zabirali».
Dzieci byli prosta pad nazirańniem miedykaŭ — jany dobra siabie adčuvali, nie było simptomaŭ, jakija treba było b lačyć. Alenie davali antybijotyki (jana pačynali ich pić jašče da špitalizacyi) — fluarahrafija pakazała, što ŭ jaje branchit.
Kaža, im pašancavała: balnica tady nie była zabita, i daktary stavilisia da ich vielmi ŭvažliva.
Ahułam žančyna chvareła 20 dzion, jaje muž — 40.
«Za 15 hod, što my znajomy, jon nikoli tak ciažka nie chvareŭ», — zaŭvažaje Alena.
«Arhanizm, jaki vynasiŭ piaciora dziaciej, nie moh padvieści»
Z balnicy siamju vypisali ŭ kancy krasavika. Adnaŭleńnie paśla karanavirusa — heta pravilnaje charčavańnie, umieranyja fizičnyja nahruzki, špacyr na śviežym pavietry.
«Daktary skazali, kab viartalisia da zvyčajnaha ładu žyćcia. Mužu treba paŭtaryć zdymak praz 3 i 6 miesiacaŭ, bo lohkija źmienieny», — kaža Alena.
Na minułym tydni jana stała donaram płazmy.
«Ja akazałasia nośbitam dvuch vidaŭ antyciełaŭ da kavidu: G i M. Heta dastatkova redkaja situacyja, čaściej byvaje adzin vid antyciełaŭ ci ich adsutnaść. Jak patłumačyli, imunitet dobra spracavaŭ. Ja vieryła ŭ svoj arhanizm. Nu nie moh jon padvieści, vynasiŭšy piaciora dziaciej i vykarmiŭšy ich», — śmiajecca maładaja maci.
Zabor płazmy zajmaje 30-40 chvilin. Uvieś hety čas pobač miedyki, jakija kantralujuć praces i tvajo samaadčuvańnie. Paśla jašče paŭhadziny znachodzišsia ŭ chole pad nazirańniem. U Hrodnie, darečy, donaraŭ «antykaranavirusnaj» płazmy biaspłatna padvozić słužba taksi.
«Kali ŭsio budzie dobra, praz dva tydni paŭtaru praceduru, — havoryć Alena. — Mužu paśla pnieŭmanii treba było bolš času na adnaŭleńnie, ale siońnia jon užo zdavaŭ kroŭ na antycieły. Kali jany jość, taksama budzie donaram.
Ščyra, nikoli nie dumała, što karanavirus moža zakranuć mianie, i staviłasia da ŭsiaho rytaryčna. U čarhovy raz zrabiła vysnovy i pryniała jak urok».
Kamientary