Cichanoŭski: Mianie vyzvalili, bo byli vialikija pratesty pa ŭsioj krainie

Viadomy błohier Siarhiej Cichanoŭski, jakoha siońnia raptoŭna adpuścili ź izalatara časovaha ŭtrymańnia, na presavaj kanferencyi raskazaŭ pra plany na vybarčuju kampaniju, piša «Radyjo Svaboda».

Siońnia ž Centravybarkam zarehistravaŭ inicyjatyŭnuju hrupu pa zbory podpisaŭ u padtrymku vyłučeńnia žonki błohiera Śviatłany Cichanoŭskaj u jakaści kandydata ŭ prezydenty.

Pavialičyć

Supracoŭniki AMAP, jakija mianie zatrymlivali i pieravozili, nazyvali mianie «voraham numar adzin dziaržavy». Ja bačyŭ u ich vačach razhublenaść. Ja adčuvaju, što sytuacyja moža pierałamicca — heta naša kraina, nas 9 miljonaŭ, i my baimsia adnaho čałavieka, dyktatara? Ja dumaju, kali buduć masavyja pratesty, to jany piarojduć na bok narodu. Jany mnie sami kazali, što 2 tysiačy ci 20 tysiač my razhonim, ale kali budzie 100 tysiač — my piarojdziem na bok ludziej.

Naš lozunh «Stop tarakan, no pasaran» naradziŭsia paśla razmovy z žančynaj z Hłybokaha, jakaja na sustrečy raskazała kazku pra tarakana. Napeŭna, u nas vybarčaja kampanija i projdzie z hetym lozunham.

Ja chaču skazać usim biełarusam, što nia varta bajacca. Nieŭzabavie ŭłada źmienicca — kali nia ŭ čas prezydenckich vybaraŭ, to ŭ najbližejšym hodzie. Usie, chto atrymaŭ sutki i štrafy — atrymaje kampensacyju. Viercie ŭ pieramieny, nia bojciesia, treba pakazvać svoj pratest i pierad vybarami, i ŭ čas vybaraŭ. Chto ciapier nia moža spłacić štrafy — źviartajciesia da nas, my dapamožam.​

Ja nie prarasiejski kandydat. U nas tolki adzin prarasiejski kandydat, i heta Łukašenka. Heta jon całavaŭsia ź Jelcynym, jon siabruje z Pucinym. U nas častka ludziej sumuje pa Savieckim Sajuzie, pensijanery ŭ asnoŭnym. Nia varta pa SSSR sumavać. Jon nia vierniecca.

Mianie vyzvalili, bo byli vialikija pratesty pa ŭsioj krainie. Heta nie zastałosia pa-za ŭvahaj hramadzkaści, u tym liku eŭrapiejskaj. A Zachad asudžaje takija metady — zabaraniać mirnyja schody, vykazvańnie svajoj dumki.

30 sutak visić na mnie, kali pačnucca chvalavańni — mianie znoŭ zakryjuć. Mianie zakryli, kab nia dać mnie mahčymaści stać kandydatam. I nadta ja aktyŭna z kamandaj jeździŭ pa Biełarusi, sustrakaŭsia z proćmaj ludziej. Ja byŭ by mocnym kandydatam — tamu mnie nie dali zarehistravacca.

Dla mianie byŭ šok siońnia, kali ja vyjšaŭ, što maju žonku zarehistravali. Ja nia viedaŭ, što jana źbirajecca balatavacca. Ale, vidać, pravaabaroncy i siabry našaj kamandy paraili, kab jana jak kandydat padała dakumenty, i takim čynam naša inicyjatyŭnaja hrupa zmahła pryniać udzieł u prezydenckaj kampanii.

Pavialičyć

CVK niezakonna mianie nie zarehistravała. Ja ź IČU zajavu ŭ CVK, z podpisam, jak maje być, u čas dasłaŭ. CVK nie skazała, što atrymała maju piśmovuju zajavu. CVK bačyć vialikuju padtrymku mianie ludźmi, i tamu mianie prosta nie dapuścili da vybaraŭ.

My vykarystajem usie zakonnyja mahčymaści vybarčaj kampanii, kab ładzić sustrečy z vybarcami pa ŭsioj krainie, danosić da ich praŭdu.

Na samo hałasavańnie my ludziej nia budziem klikać — tolki bajkot.

Z čym Łukašenka pojdzie na hetyja vybary? Z tym, što niama vajny? Mnie zdajecca, jon sam stvoryć ciapier vajnu — hramadzianskuju. Ja dumaju, što 90% biełarusaŭ nie padtrymlivajuć Łukašenku. Jakaja b ni była mocnaja ŭłada, ale biez padtrymki narodu ničoha nie atrymajecca. Kali jon znoŭ sfalsyfikuje vybary — pačniecca partyzanskaja vajna. Mnie tak zdajecca.

Majoj žoncy telefanavali sacyjalnyja słužby i namiakali, što vaš muž siadzić u turmie, moža, u vas nia ŭsio dobra ŭ siamji.

Paśla vybaraŭ ja pahladžu — moža, mnie źjechać z krainy? Moža, biełarusy zasłuhoŭvajuć takuju ŭładu? Kali my, inšyja aktyvisty, chaj niekalki tysiač, niešta robiać, a astatnija buduć abyjakavyja da ŭsiaho, kali ja pierakanajusia na svaim dośviedzie, što tak i jość — ja źjedu. Ale mnie zdajecca, što na hetych vybarach biełarusy skažuć svajo słova.

• 0
• 0
• 0
• 0
• 0
• 0
• 0
• 0