Ułady Bresta zaklikali abmiežavać kantakty, nie vyjazdžać z horada, minimizavać pieramiaščeńni: bolš za 100 pnieŭmanij štodzień
«Epidemijałahičnaja situacyja pa COVID-19 (karanavirusnaj infiekcyi) u Breście napružanaja. U horadzie adznačajecca pik zachvorvańnia», — paviedamlaje Brescki zanalny centr hihijeny i epidemijałohii.
Štodnia ź pnieŭmanijaj špitalizujucca bolš za 100 haradžan, adznačajecca ŭ paviedamleńni. — Na haradskim uzroŭni miedycynskaja dapamoha chvorym na pnieŭmaniju akazvajecca ŭ Centralnaj haradskoj balnicy i Bresckaj balnicy №1. Miescaŭ dla špitalizacyi dastatkova.
Razam z tym, pavodle sanitarna-epidemijałahičnaj słužby horada, niahledziačy na infarmavańnie ŭ ŚMI, staŭleńnie častki nasielnictva da prafiłaktyčnych mier niedastatkova surjoznaje. Tak, navat u kramach i ŭ hramadskim transparcie tolki častka ludziej vykarystoŭvajuć maski.
Brescki harvykankam i Brescki zanalny centr hihijeny i epidemijałohii nastojliva rekamiendujuć nasielnictvu Bresta abmiežavać naviedvańnie miescaŭ masavaha zboru ludziej, chadžeńnie ŭ hości, nie vyjazdžać u inšyja rehijony, źvieści da minimumu adchileńni ad žyćciova nieabchodnych maršrutaŭ: na pracu i nazad, u kramu i, pry nieabchodnaści, u apteku.
Pry naviedvańni kramaŭ, handlovych centraŭ, aptek i inšych miescaŭ zboru ludziej vykarystoŭvać maski, vykonvać sacyjalnaje dystancyjavańnie ŭ 1,5 m adno ad adnaho, karystacca antysieptykami, abaviazkova vykarystoŭvać maski ŭ hramadskim transparcie.
Pnieŭmanija raźvivajecca prykładna ŭ 15% zaražanych karanavirusam. Pa kolkaści pnieŭmanij možna vyznačyć stupień raspaŭsiudžvańnia infiekcyi.
Pieršymi «čyrvonymi zonami» pa karanavirusie ŭ Biełarusi byli Minsk i Viciebsk. Pry adsutnaści karancinnych abmiežavańniaŭ karanavirus raspaŭsiudziŭsia na inšyja rehijony krainy.
Nakolki možna mierkavać pa tych źviestkach ź miescaŭ, jakija prychodziać u «Našu Nivu», u apošnija tydni situacyja dramatyčna abvastryłasia ŭ Bresckaj, Homielskaj, Hrodzienskaj abłaściach.
U Bresckaj vobłaści pieršaj plamaj staŭ Łuniniec. Paśla stała viadoma pra rost kolkaści zaražeńniaŭ u Baranavičach i Pinsku.
Poŭnaja statystyka zachvorvańnia na pnieŭmanii i śmierciaŭ ad ich u Biełarusi nie publikujecca ź viasny. Ministerstva achovy zdaroŭja nie adkazvała na pytańni žurnalistaŭ z 17 krasavika.
Ciapier čytajuć
«Śvińni zarochkali. Biez vady daŭno nie siadzieli, ja b im adklučyŭ». Azaronak abrynuŭsia na žycharoŭ rajona Lebiadziny15
Kamientary