Cichanoŭskamu vystavili abvinavačvańni ŭ ramkach kryminalnaj spravy
Siarhieju Cichanoŭskaha i jaho paplečnikam vystaŭlenyja abvinavačvańni ŭ ramkach kryminalnaj spravy. Što za sprava i pa jakim artykule jana raspačataja, stanie viadoma zaŭtra.
Siarhiej ža zastajecca pad vartaj na niavyznačany termin, paviedamlaje «Kraina dla žyćcia».
Siarhiej Cichanoŭski — adzin z samych papularnych u krainie videabłohieraŭ. Jon zaklikaŭ da vuličnych akcyj pratestu suprać režymu Alaksandra Łukašenki i kazaŭ, što pieramien možna dabicca tolki šlacham vuličnych pratestaŭ i zabastovak, što nadziei na spraviadlivy padlik hałasoŭ pry hetaj sistemie niama.
Kali Cichanoŭskaha aryštavali na 15 sutak pierad abviaščeńniem prezidenckich vybaraŭ, kab nie dać jamu mahčymaści bałatavacca, dakumienty na rehistracyju padała jaho žonka Śviatłana Cichanoŭskaja — nastaŭnica, jakaja ciapier siadzić doma z małymi dziećmi. Jana vyrašyła zrabić toje, pra što maryŭ jaje muž. Jarmošynaj nie zastavałasia vybaru, akramia jak jaje zarehistravać.
Ale kampaniju vioŭ sam Siarhiej. Jon naniaŭ aŭtadom i jeździŭ na im z horada ŭ horad. Sotni ludziej źbiralisia viečarami na płoščach haradoŭ, kab pastavić podpis i pahavaryć ź im. Z saboj jany brali tapki, jakimi bjuć tarakanaŭ. Paśla taho jak piensijanierka z Hłybokaha zhadała dziciačy vierš «Tarakanišča» — pra toje, jak adno maleńkaje nasiakomaje pahrozami trymaje ŭ strachu vialikich źviaroŭ — Cichanoŭski zrabiŭ tapak simvałam svajoj kampanii. Hety vobraz vyklikaŭ i śmiech, i entuzijazm ludziej.
29 maja Siarhieja Cichanoŭskaha zatrymali ŭ Hrodnie. Ale pravakacyja, jakaja papiaredničała zatrymańniu, trapiła na videa, i za noč karystalniki internetu identyfikavali žančynu ź Minska, jakaja adyhrała ŭ joj centralnuju rolu.
Paźniej byli pieratrusy ŭ ofisie Cichanoŭskaha, domie jaho maci i na leciščy. Na leciščy Cichanoŭskaha siłaviki nibyta znajšli $900 tysiač.
Kamientary