Pravaabaroncy patrabujuć spynić cisk na ŭdzielnikaŭ vybarčaj kampanii
Biełaruskaja pravaabarončaja supolnaść vystupiła z terminovaj zajavaj.
«Vybarčaja kampanija ŭpieršyniu ŭ historyi niezaležnaj Biełarusi z samaha svajho pačatku prachodzić u atmaśfiery strachu, pahroz i zapałochvańnia, iduć zatrymańni i aryšty aktyvistaŭ inicyjatyŭnych hrup pa vyłučeńni kandydataŭ u prezidenty i prostych vybarščykaŭ, jakija ŭdzielničajuć u mirnych pikietach pa zbory podpisaŭ, — adznačajecca ŭ zajavie. — Praciahvajecca palityčna matyvavany kryminalny pieraśled Siarhieja Cichanoŭskaha, jaki źbiraŭsia vyłučycca kandydatam u prezidenty, i šerahu inšych hramadzian pa spravie, u jakoj ułady źviarnulisia da adkrytaj pravakacyi.
Ranicaj 11 červienia stała viadoma ab tym, što Śviatłana Cichanoŭskaja, jakaja vyłučajecca kandydatam u prezidenty, paprasiła členaŭ svajoj inicyjatyŭnaj hrupy nie pravodzić pikiety pa zbory podpisaŭ u bližejšyja niekalki dzion z-za aściarohi praciahu represij u dačynieńni da zborščykaŭ podpisaŭ.
U hety ž dzień pačalisia pieratrusy ŭ hałaŭnym ofisie «Biełhazprambanka», kiraŭnikom jakoha ciaham 20 hadoŭ byŭ vyłučany kandydatam u prezidenty Viktar Babaryka. My razhladajem hetyja dziejańni jak cisk na adnaho z pretendentaŭ na pasadu prezidenta.
U takich umovach nielha kazać ab praviadzieńni sumlennych i spraviadlivych vybaraŭ. Nahadvajem, što ŭ adpaviednaści z Kapienhahienskim dakumientam ABSIE, Respublika Biełaruś, jak dziaržava-udzielnica Arhanizacyi pa biaśpiecy i supracoŭnictvu ŭ Jeŭropie, zajaviła, što vola naroda, vykazvanaja svabodna i sumlenna ŭ chodzie pieryjadyčnych i sapraŭdnych vybaraŭ, źjaŭlajecca asnovaj ułady i zakonnaści luboha ŭrada, i abaviazałasia pavažać prava svaich hramadzian prymać udzieł u kiravańni krainaj niepasredna abo praz pradstaŭnikoŭ, jakija vybirajucca imi svabodna ŭ chodzie sumlennaha vybarčaha pracesu».
Pravaabaroncy zaklikajuć ułady Biełarusi spynić cisk i zapałochvańnie ludziej u suviazi ź ich udziełam u vybarčaj kampanii i zabiaśpiečyć poŭnuju realizacyju fundamientalnych pravoŭ i svabod čałavieka — u tym liku prava na svabodu vykazvańnia mierkavańnia, prava na mirnyja schody, prava być abranym na svabodnych vybarach, prava nie padviarhacca advolnym zatrymańniam.
Kamientary