Płan Babaryki: pra jaho raskazaŭ juryst, jakomu pretendent davieryŭ padaču dakumientaŭ u CVK na vypadak svajho aryštu
Viktar Babaryka ŭsio jašče nie na svabodzie, ale heta nie pieraškodzić pravieści praces rehistracyi da kanca. Pra heta ranicaj 20 červienia paviedamili ŭ štabie patencyjnaha kandydata ŭ prezidenty krainy.
«Naš štab davodzić praces rehistracyi da kanca. Tamu siońnia, 20 červienia, my padali pakiet dakumientaŭ dla rehistracyi Viktara Babaryki kandydatam u prezidenty Respubliki Biełaruś u Centralnuju vybarčuju kamisiju», — havorycca ŭ paviedamleńni.
«Usie vy, udzielniki inicyjatyŭnych hrup i aktyŭnyja hramadzianie Biełarusi, addali šmat siłaŭ i času, kab heta adbyłosia. Nievierahodny miesiac i rekordnaja kolkaść sabranych podpisaŭ za vyłučeńnie alternatyŭnaha kandydata. Dziakuj vam! Mienavita hetyja dziejańni dazvolili padać siońnia ŭ CVK poŭny pakiet dakumientaŭ, u absalutnaj adpaviednaści z artykułam 68 Vybarčaha kodeksa Respubliki Biełaruś», — dapoŭnili ŭ štabie Babaryki.
Babaryka mierkavaŭ, što i jaho, jak Siarhieja Cichanoŭskaha, mohuć aryštavać, ale, u adroźnieńnie ad Cichanoŭskaha, zahadzia padrychtavaŭ jurydyčny vychad z hetaj situacyi, aformiŭšy davieranaść na advakata.
Juryst Maksim Znak, na jakoha Viktar Babaryka vypisaŭ davieranaść na reprezientacyju jaho intaresaŭ u CVK, koratka raspavioŭ pra siabie i płan Babaryki.
«Ja paznajomiŭsia ź Viktaram 27.05.2020. 28.05.2020 ja staŭ kuryravać jurydyčny kirunak u pracy štaba. 20.06.2020 ja pa davieranaści padaŭ dakumienty ŭ CVK dla pačatku rehistracyi Viktara Babaryka ŭ jakaści kandydata ŭ Prezidenty Respubliki Biełaruś. Mabyć, heta ŭsie fakty, jakija vam treba viedać, kab zrazumieć, u čym zaklučajecca płan Viktara Babaryki», — napisaŭ juryst Znak.
«Jaho płan — heta vy, — napisaŭ Maksim Znak. — Heta tysiačy dobrych i advažnych ludziej, jakija adhuknulisia na zaklik ustupić u inicyjatyŭnuju hrupu i, nie zdahadvajučysia ab tym, što heta niemahčyma, sabrali amal 435 000 podpisaŭ. Heta sotni tysiač tych, u kaho pračnułasia nadzieja na pieramieny. Heta miljony tych, chto budzie vyrašać los krainy — narod Respubliki Biełaruś.
U filmie pra paŭstańnie raboŭ pad pravadyrstvam Spartaka jość finalnaja scena, dzie na pytańnie lehijanieraŭ: «Chto Spartak?» pačułasia šmathałosaje «Ja — Spartak!» — piša Maksim Znak.
Maksim Znak pracuje kiraŭničym partnioram u jurydyčnaj kampanii «AB Baraŭcoŭ i Salej BIS».
Pra Maksima Znaka čytajcie taksama: Kandydat u «žaleznyja ludzi»: jak minski juryst zachapiŭsia tryjatłonam, udzielničaje ŭ honkach na 226 km i zabyŭ pra mihreń
Nahadajem, što 11 červienia prajšli pieratrusy ŭ Biełhazprambanku, jakim raniej kiravaŭ Viktar Babaryka, i ŭ kampanijach jaho siabroŭ. A 18 červienia Babaryku i jahonaha syna Eduarda zatrymali i źmiaścili ŭ SIZA KDB. Heta zdaryłasia paśla taho, jak stała viadoma, što kamanda Babaryki sabrała rekordnuju dla Biełarusi kolkaść podpisaŭ u jaho padtrymku. Usiaho razam z Babarykam aryštavanyja jak minimum 20 jaho siabroŭ, kaleh pa biznesie i siabroŭ inicyjatyŭnaj hrupy.
Raniej byŭ aryštavany videabłohier Siarhiej Cichanoŭski, jaki taksama zajaŭlaŭ pra svaje pieradvybarčyja namiery. Razam ź Cichanoŭskim pa jahonych spravach prachodziać kala dziesiaci čałaviek.
Akramia ich, byli aryštavanyja viadomyja palityki Mikałaj Statkievič i Pavieł Sieviaryniec za arhanizacyju vuličnych pratestaŭ.
Nikoli raniej pieradvybarnaja kampanija nie prachodziła ŭ takoj atmaśfiery.
Ciapier čytajuć
23‑hadovy achoŭnik z Astraŭca zahinuŭ za Rasiju na vajnie. Pavajavaŭ jon, vidać, kala miesiaca1
Kamientary