ANT pakazaŭ kadry vočnaj staŭki Babaryki z padnačalenymi. Babaryka nie kaža ni słova
Telekanał ANT pakazaŭ «śpiecrasśledavańnie», pryśviečanaje tak zvanaj spravie Biełhazprambanka.
U siužecie paviedamlajecca, što fihuranty nibyta aktyŭna supracoŭničajuć sa śledstvam.
Byli pakazanyja kadry vočnaj staŭki. U joj brali ŭdzieł v. a. staršyni praŭleńnia Biełhazprambanka Kirył Badziej i jaho były šef, eks-staršynia praŭleńnia banka — Viktar Babaryka.
Słovy Babaryki nie byli pakazanyja ŭ siužecie.
Badziej nazyvaje kampanii (u tym liku «PryvatLizinh», «Pravavy dyjałoh» i «Sistemy apracoŭki») i proźviščy ludziej, ad jakich atrymlivaŭ hatoŭku — ad 250 tysiač da 300 tysiač štohod.
«Apošniaja suma, jakaja była ŭžo viasnoj 2020 hoda (Viktar Dźmitryjevič pakidaŭ bank), jon daručyŭ samastojna pieradać hetyja hrašovyja srodki inšym kaleham. Hrošy ja addavaŭ Iljasiuku, Kuźmiču i Šabanu. Heta była nie maja inicyjatyva. Mnie jaje ahučyŭ Viktar Dźmitryjevič [Babaryka]. Hrašovyja srodki pieradavalisia, jak razumieju, za supracoŭnictva z nazvanymi kampanijami. Pamiž bankam i kampanijami», — paviedamlaje Badziej.
Načalnik adździeła śledčaha ŭpraŭleńnia KDB Biełarusi Kanstancin Byčak padaje spravu tak: «Kali ścisła, to sutnaść biznesu była takaja. «PryvatLizinh» realizoŭvaŭ nasielnictvu tavary ŭ rasterminoŭku abo lizinh i raźličvaŭsia z pradaŭcom za košt kredytnych resursaŭ banka. Takim čynam, paśpiachovaść dziejnaści kampanii niepasredna zaležała ad umoŭ, na jakich bank padavaŭ kredytnyja resursy. Kiraŭnictvam banka, u tym liku staršynioj praŭleńnia Viktaram Babarykam, pradprymalnikam pastavili ŭmovu: za spryjalnaje vyrašeńnie pytańniaŭ ab kredytavańni na vyhadnych umovach jany pavinny byli davać častku prybytku ŭ vyhladzie tak zvanaha adkatu», — skazaŭ Kanstancin Byčak.
Telekanał nie daje słova ani Babaryku, ani jaho advakatam ci pradstaŭnikam, kab jany padali svaju viersiju padziej, a zapis pry hetym maje zmantažavany charaktar.
Varta adznačyć, što pakaz vočnaj staŭki ŭ ŚMI taksama piarečyć jak tajamnicy śledstva, tak i prezumpcyi nievinavataści.
Apytanka
Ciapier čytajuć
Vychadcy z «Alfa» KDB Biełarusi zajmajuć kiraŭničyja pasady ŭ novym rasijskim supiersakretnym śpiecpadraździaleńni, pryznačanym dla zabojstvaŭ za miažoju15
Kamientary