Na terytoryi Staroha zamka ŭ Hrodnie archieołahi znajšli viežu časoŭ Vitaŭta
U chodzie archieałahičnych daśledavańniaŭ, jakija pravodziacca ŭ dvary Staroha zamka ŭ ramkach jaho rekanstrukcyi, archieołahi rasčyścili frahmienty padmurkaŭ viežy. I faktyčna sa 100-pracentnaj dakładnaściu možna kazać pra toje, što heta — vieža časoŭ Vitaŭta, paviedamlaje «Hrodzienskaja praŭda».
— Heta frahmienty padmurkaŭ hatyčnaj viežy. Miarkujučy pa jaje raźmiaščeńni i habarytach, možna kazać, što heta, chutčej za ŭsio, vieža, namalavanaja na hraviury Ciundta 16 stahodździa. Na hraviury my bačym hatyčny zamak na bierazie Niomana — toj, jaki siońnia pryniata nazyvać zamkam Vitaŭta, — raspavioŭ Alaksandr Chaćko, staršy navukovy supracoŭnik adździeła archieałohii Hrodzienskaha dziaržaŭnaha historyka-archieałahičnaha muzieja.
Archieołahi znajšli najbujniejšuju z čatyroch viežaŭ zamka. Na hraviury jana kruhłaja, a voś padmurak, jaki adkryŭsia siońnia, kvadratny. Jak tłumačać śpiecyjalisty, heta zakanamierna: našy prodki budavali kruhłyja viežy mienavita na kvadratnych padmurkach. Darečy, padobny jość u Trakajskim zamku.
Vyznačyć pamiery viežy možna pa adkrytych abrysach frahmientaŭ. Taŭščynia ścien — kala troch mietraŭ, źniešniaja daŭžynia — 13—13,75 mietra. Vykanana jana ŭ tradycyjnaj muroŭcy dla zamka, charakternaj dla ziamiel Vialikaha Kniastva Litoŭskaha: kamiani, a pamiž imi — zapaŭnieńnie ź bitaj cehły ź nievialikimi kamianiami.
Unikalnaść znachodki ŭ tym, što mnohija historyki łakalizavali hetuju viežu ŭ roznych miescach. Jaje častki ŭskryvali i raniej, adnak nievialikija frahmienty nie davali jasnaści, što heta.
U najbližejšy čas historykam i archieołaham treba budzie bolš staranna daśledavać znachodku i, mahčyma, udakładnić uzrost cahlin pa dacie ich abpału. Heta dazvolić daviedacca, kali była pabudavanaja vieža.
Kamientary