Kiraŭnik MZS Uładzimir Makiej vystupiŭ z adkrytym zvarotam da dypłamataŭ. Jon raźmieščany na sajcie MZS.
«Zaŭsiody hanaryŭsia i budu hanarycca kalektyvam Ministerstva zamiežnych spraŭ našaj krainy, usioj sistemaj dypłamatyčnaj słužby Respubliki Biełaruś. Moža być, za čverć stahodździa nam nie ŭdałosia dasiahnuć hałavakružnych pośpiechaŭ, ale biełaruskaja dypłamatyja dakładna nikoli nie rabiła taho, za što moža być soramna.
Vy lepš za mianie viedajecie, jak šmat praktyčnych vynikaŭ dla našaj krainy, ludziej i kankretnaha biełarusa pryniesła vaša praca.
Na žal, tak atrymałasia, što siońnia naša kraina pieražyvaje, napeŭna, samy składany etap u svajoj najnoŭšaj historyi.
Havorka na samaj spravie idzie ab zachavańni dziaržaŭnaści. Usie vy patryjoty, vydatna adukavanyja, talenavityja i nieabyjakavyja ludzi. Tamu, zrazumieła, što ŭsie my prymajem toje, što adbyvajecca, blizka da serca i vostra pieražyvajem za svoj narod i Baćkaŭščynu.
Hetyja padziei nie mohuć pakinuć nikoha z nas abyjakavymi tamu, što my padzialajem ahulnačałaviečyja, našy biełaruskija, kaštoŭnaści, vystupajem za adzinstva nacyi, nie prymajem radykalizm i nieapraŭdany hvałt. Usie my za toje, što nazyvajecca jomistym biełaruskim słovam «ludskaść».
«A vy za biełych ci za čyrvonych?». Takija pytańni i prapanovy prychodziać i mnie, choć u našaj historyi my heta ŭžo prachodzili. Tak, asabisty i sumlenny vybar davodzicca rabić zaŭsiody. Pytańnie tolki ŭ tym, u jakich umovach jon robicca.
Ja jašče mahu zrazumieć, kali razdajucca pahrozy ŭ adras dziaržaŭnaha słužačaha, jaki zajmaje kankretnuju pasadu.
Ale podleńki, ananimny cisk na siamju, u tym liku na małaletnich dziaciej, nijak nie ŭkładvajucca ŭ majoj hałavie z paniaćciem «demakratyja». Za hetyja ślozy majho adzinaccacihadovaha syna ja hatovy pierahryźci horła. Demakratyjaj tut i nie pachnie. Tut śmiardzić pahromami i raspravami.
Adzinki, napeŭna, spasujuć. Ale ŭ cełym «dziakuj» zapałochvalnikam, bo takija dziejańni scemientujuć nas — tych, chto sapraŭdy chacieŭ by dabra radzimie. Heta — ab asabistym. Pavažanyja kalehi! Kožny maje prava na emocyi, hramadzianskuju i, bolš taho, čałaviečuju pazicyju. Biez haračaha serca ŭ našaj prafiesii nijak.
Ale i bieź ćviarozaha pohladu na situacyju taksama. Častka našaj pracy — stvarać i dasiahać zhody. Nieści mir, stvarać siabroŭstva, umovy dla ŭzajemnaha handlu i inviestycyj, dla humanitarnych i čałaviečych kantaktaŭ.
Arhanizoŭvać dyjałoh navat u samych składanych, zdavałasia b, biazvychadnych umovach. I na hetym šlachu dypłamatam jak nikomu inšamu davodzicca sutykacca z palarnymi punktami hledžańnia i, pavažajučy ich, znachodzić kansensus. Vy heta ŭmiejecie rabić.
Tamu nie zabyvajcie svajo prafiesijnaje paklikańnie. Vykazvajučy svaju hramadzianskuju pazicyju, nie sprabujcie ŭnosić raskoł u kalektyŭ, vyniki pracy jakoha važnyja ŭ pieršuju čarhu dla krainy i naroda.
Nu, a kali ŭ siłu niejkich pryčyn nie možacie znajści ŭ sabie matyvacyju — nie ŭstupajcie ŭ ździełku z sumleńniem, budźcie sumlennymi i pryncypovymi da kanca.
Kalehi, nikoli nielha ślepa iści za masami. Vy — dypłamaty, vy prafiesijna abapirajeciesia na ŭłasnyja mierkavańni i adčuvańni. Pieramieny patrebnyja, hetaha nichto nie admaŭlaje.
Ale nie canoj hramadzianskaha supraćstajańnia abo revalucyj. U hetym vypadku achviar i niehatyŭnych nastupstvaŭ budzie ŭ razy bolš.
My ŭžo adkinutyja na šmat hadoŭ u našym raźvićci z-za padziej apošnich dzion. A našy ludzi, naša kraina hetaha nie zasłuhoŭvajuć.
Chaj i pavolny, ale evalucyjny praces u kančatkovym vyniku zaŭsiody akazvajecca bolš efiektyŭny. My vartyja lepšaha, dzie kožny adno dla adnaho čałaviek, ziamlak, partnior i ceły śviet, a nie «čyrvony» ci «bieły».
My prachodzim balučy etap stanaŭleńnia niezaležnaj dziaržavy, paśpiavańnia hramadzianskaj supolnaści. Zaŭsiody analizujcie situacyju. Heta składana pry takim infarmacyjnym patoku, ale vy heta ŭmiejecie.
U hety losavyznačalny dla našaj krainy momant jak nikoli važna adstojvać źniešniepalityčnyja intaresy Biełarusi.
Jany niaźmiennyja, jany byli, jość i nikudy nie syduć. Tamu biez emocyj adkažycie sabie na pytańnie: ja ŭsio jašče mahu prynieści karyść krainie na svaim učastku pracy?
Ja na hetaje pytańnie sabie adkazaŭ, bo nie chaču stracić svaju krainu. Kali ŭ vas adkaz stanoŭčy, adkińcie sumnievy i davajcie praciahvać adkazna rabić svaju spravu! Mahčyma, mienavita da hetaha momantu historyi vas rychtavaŭ los!» — piša Makiej.
Apytanka
Ciapier čytajuć
Aktor Toŭścikaŭ: Na pakazie, kali pryjšli zbolšaha rasijskija hledačy — publika śmiajałasia. A kali byli biełarusy, Cichanoŭskaja — stajała poŭnaja cišynia11
Kamientary