Čamu ŭ druhim kvartale hoda śmiarotnaść vyrasła na 5500 čałaviek? Minzdaroŭja maŭčyć
Biełstat u 2020 hodzie, u adroźnieńnie ad minułych hadoŭ, nie apublikavaŭ statystyki pra śmiarotnaść u pieršym paŭhodździ hetaha hoda. Ale hetaja statystyka ŭspłyła ŭ publikacyi AAN, kudy jaje pieradaje Biełaruś.
Ličby šakujuć.
U červieni 2020 rost śmiarotnaści proci minułaha červienia skłaŭ 3753 čałavieki.
U mai 2020 rost śmiarotnaści proci minułaha maja skłaŭ 1309 čałaviek.
U krasaviku 2020 rost śmiarotnaści proci minułaha krasavika skłaŭ 543 čałavieki.
Ličby studzienia-sakavika ŭ cełym adpaviadajuć pakazčykam hadoŭ ź nizkim uzroŭniem zachvorvańnia na hryp i VRVI, jaki adznačaŭsia hetaj zimoj. Ale ličby śmiarotnaści ŭ mai-červieni absalutna biesprecedentnyja. Takich nie nazirałasia ni razu za ŭsie časy, pakul na sajcie AAN viadziecca padrabiaznaja statystyka — z 1980 hoda.
Zychodziačy z hetych ličbaŭ,
śmiarotnaść za krasavik—červień pieravysiła siaredniuju za apošnija 5 hadoŭ prykładna na 5500 čałaviek. Vierahodna, heta i jość realny vynik karanavirusu ŭ našaj krainie.
Jon žachlivy: suvymierny z krainami i rehijonami śvietu, dzie ŭdar Covid-19 byŭ najhoršy.
Pa aficyjnych źviestkach, stanam na 30 červienia ad Kavidu ŭ Biełarusi pamierła tolki 398 pacyjentaŭ — amal u 14 razoŭ mienš, čym pryrost statystyki śmiarotnaści za krasavik-červień.
Pa tych ža aficyjnych źviestkach, ad 1 lipienia da siońniašniaha dnia pamierła jašče 307 pacyjentaŭ z Kavid.
Statystyka śmiarotnaści ad Kavid, jak i statystyka pnieŭmanij pa asobnych rajonach i balnicach zasakrečana ad krasavika, tamu ŚMI nijak nie mahli jaje pravieryć. Va ŭsich inšych jeŭrapiejskich krainach statystyka Kavid nie była zasakrečana. U bolšaści jeŭrapiejskich krain karancinnyja miery pa Kavid byli našmat stražejšyja, što stała temaj dla vialikaj palemiki ŭ našaj krainie.
«Naša Niva» zapytała ŭ Ministerstvie achovy zdaroŭja, čym jany tłumačać rost śmiarotnaści ŭ druhim kvartale na 5500 čałaviek. Adkazu na zapyt my nie atrymali.
Ciapier čytajuć
«Dla biełaruskich uładaŭ ja, chutčej, mahčymaść, a nie pahroza». Kaleśnikava dała vialikaje intervju Zołatavaj77
Kamientary