Štraf i sutki. U Hrodnie vynieśli prysud žančynie, što sarvała na mitynhu z čałavieka ŭ cyvilnym masku
10 sutak aryštu i štraf 405 rubloŭ atrymała haradzienka Ludmiła Taranok za toje, što źniała masku z tvaru milicyjanta ŭ cyvilnym padčas akcyi salidarnaści ŭ Hrodnie. Takoje rašeńnie vyniesła sudździa Leninskaha rajona Hanna Leŭsik, piša miascovy błoh s13.
Sudovaje pasiadžeńnie było vyjaznym i prachodziła ŭ administracyjnym korpusie IČU na vulicy Haja. Tam Ludmiła Taranok znachodzicca ź niadzieli.
Žančynu pryznali vinavataj u parušeńni adrazu troch artykułaŭ KaAP RB — 10.9 (Naŭmysnaje źniščeńnie abo paškodžańnie majomaści. Vierahodna, havorka idzie pra miedycynskuju masku), 17.1 (Drobnaje chulihanstva), 23.34 (Parušeńnie zakanadaŭstva ab masavych mierapryjemstvach).
Incydent adbyŭsia 12 vieraśnia. U hety dzień kala handlovaha doma «Nioman» adbyłasia žanočaja akcyja. Na joj sabralisia kala 100 haradzienak. Dziaŭčyny śpiavali pieśni i vykrykvali łozunhi. Uvieś hety čas akcyju na kamieru zdymali dvoje nieviadomych mužčyn.
U adzin momant adna z žančyn padyšła da mužčyny z kamieraj i pasprabavała sarvać masku. Da jaje na dapamohu padbiehła jašče adna dziaŭčyna. Udvaich jany sarvali masku z tvaru, paśla čaho mužčyna chutka pačaŭ pakidać placoŭku ŭniviermaha. Žančyny kinuli jamu ŭśled reštki maski i kryčali: «Hańba!»
Ludmiłu Taranok zatrymali ŭ hety ž dzień u jaje ŭłasnaj kvatery razam z małodšym synam. Siamju advieźli ŭ Leninski RAUS. Syna adpuścili pad ranicu paśla dačy pakazańniaŭ.
Pravaabaronca Raman Jurhiel tak prakamientavaŭ dadzieny incydent:
— Žančyna paviała siabie emacyjna ŭ hetak naelektryzavanaj va ŭsioj krainie situacyi. Ale i toj supracoŭnik RAUS, jaki zdymaŭ hrupu žančyn, nie pavinien byŭ tak blizka ich zdymać. Dumaju, što takoje rašeńnie sudździa vynies, kab nadalej inšyja ludzi nie zdymali maski i nie vylivali svoj hnieŭ na «videaapierataraŭ» RAUS.
Ludmiła Taranok — hrodzienskaja aktyvistka, nie raz vystupała na akcyjach salidarnaści. Žančyna pracuje šmat hadoŭ u «Hrodnaprambud» tynkoŭščycaj. Jana adna ź pieršych padtrymała strajkoŭcaŭ na pradpryjemstvie. Žančyna žyvie razam z synam. Na dadzieny momant Uładu nieabchodna apłacić pasłuhi advakata, a taksama štraf.
-
Pačobut nie staŭ razmaŭlać z šaściorkami — ni z Pratasievičam, ni z Vaskrasienskim
-
Vaskrasienski: Azotnyja ŭhnajeńni i sankcyi ŭ adnosinach fiz– i jurasobaŭ — i 1135 palitviaźniaŭ buduć u Vilni
-
«Pryvieźli maju žonku i skazali, što jaje buduć katavać». Para z Ukrainy raskazała žachlivuju historyju pieraśledu ŭ Biełarusi
Kamientary