Vykładčyki MDŁU padrychtavali zvarot da rektara. Pad dakumientam — užo 79 podpisaŭ
Užo 79 vykładčykaŭ MDŁU padpisalisia pad adkrytym listom da rektara VNU Natalli Łapcievaj z prośbaj adnavić adličanych studentaŭ (ich 14 i adna mahistrantka), a taksama viarnuć na pracu zvolnienych kaleh — Natallu Dulinu, Hannu Abłovu i Ksieniju Katkovu. Skany aryhinałaŭ zvarotu i podpisaŭ jość u redakcyi Tut.by.
Vykładčyki MDŁU zaklikali ŭ svaim liście spynić zvalnieńni supracoŭnikaŭ i adličeńni studentaŭ univiersiteta, spynić usialaki cisk na prafiesarska-vykładčycki skład i studentaŭ, a taksama pierastać pieraškadžać u praviadzieńni mirnych schodaŭ. Dadzienaje prava, zaŭvažana ŭ liście, harantujecca art. 35 Kanstytucyi Respubliki Biełaruś.
Akramia hetaha, padpisanty zapatrabavali adnavić na pasadzie dacenta kafiedry italjanskaj movy Natallu Dulinu, vykładčyka kafiedry teoryi i praktyki anhlijskaj movy Hannu Abłovu i vykładčyka kafiedry teoryi i praktyki pierakładu № 2 Ksieniju Katkovu, a taksama «staranna razabracca ŭ najaŭnaści abjektyŭnych pryčyn dla zvalnieńnia dadzienych vykładčykaŭ».
U kalektyŭnym zvarocie adznačana taksama, što adličanyja studenty i mahistrantka zarekamiendavali siabie jak dobrasumlennyja i dyscyplinavanyja studenty. Z navučalnym płanam spraŭlalisia, siaredni bał akademičnaj paśpiachovaści — vyšej siaredniaha, zapazyčanaściaŭ pa dyscyplinach nie mieli, ciažkaściaŭ z vučobaj nie adčuvali.
Pad zvarotam svaje podpisy pastavili ŭ tym liku prafiesary kafiedry zamiežnaj litaratury Maryna Rahačoŭskaja i Volha Sudlankova, zahadčyk kafiedry zamiežnaj litaratury Juryj Stułaŭ, zahadčyk kafiedry historyi, suśvietnaj kultury i turyzmu Siarhiej Novikaŭ (člen rady MDŁU), kandydat fiłałahičnych navuk i dacent kafiedry leksikałohii anhlijskaj movy Michaił Drazdoŭ, kandydat fiłałahičnych navuk, dacent kafiedry ahulnaha movaznaŭstva Volha Horyckaja i inšyja.
Vykładčyki ŭžo addali najaŭnyja podpisy i list u kancylaryju rektara:
— Rehistravać ich nie stali: maŭlaŭ, heta ŭnutrany dakumient, ź imi tak rabić nielha. Na prośbu pastavić na našym ekzemplary chacia b adznaku ab pryjomie, skazali prosta napisać datu i čas — paviedamiła Darja Karpovič, vykładčyca kafiedry druhoj zamiežnaj movy.
Dalej u płanach vykładčykaŭ davieści kolkaść podpisaŭ da 200, a taksama — padać taki ž zvarot u Ministerstva adukacyi.
Kamientary