«Ciažkija nastupstvy musiać nastupić dla paciarpiełaha». Advakat prakamientavaŭ dziŭnaje zatrymańnie miedyka i žurnalistki Tut.by
19 listapada Hienprakuratura paviedamiła pra zatrymańnie miedyka, jaki apubličyŭ źviestki ab stanie Ramana Bandarenki. Taksama ŭviečary siłaviki pryjšli ŭ kvateru žurnalistki Tut.by Kaciaryny Barysievič, jakaja pisała pra śmierć chłopca. Jaje zabrali ŭ SIZA KDB.
Kryminalnaja sprava zaviedziena pa č. 3 art. 178 Kryminalnaha kodeksa Respubliki Biełaruś («vydavańnie miedycynskaj tajamnicy»).
«Miedyk vydaŭ miedycynskuju tajamnicu, pry hetym pradstaviŭ niedakładnuju infarmacyju», — udakładniajecca ŭ paviedamleńni Hienprakuratury.
Viedamstva adznačaje, što takija dziejańni z boku doktara i žurnalista paciahnuli za saboj «ciažkija nastupstvy, jakija vykazalisia ŭ padvyšanaj napružanaści ŭ hramadstvie, stvareńni atmaśfiery niedavieru da dziaržaŭnych orhanaŭ i pamknieńniaŭ hramadzian da ahresii i supraćpraŭnych dziejańniaŭ».
«Naša Niva» paprasiła prakamientavać situacyju advakata Andreja Mačałava.
«Zavodzić kryminalnuju spravu biez zajavy pradstaŭnika paciarpiełaha sama Hienprakuratura pa hetym artykule moža, — miarkuje Mačałaŭ.
— Ale ŭźnikaje pytańnie, što za ciažkija nastupstvy paciahnuła raskryćcio miedycynskaj tajamnicy? Bo ciažkija nastupstvy musiać nastupić dla paciarpiełaha (paśla vydavańnia tajamnicy jon raźvioŭsia, straciŭ pracu, ździejśniŭ suicyd). Napružanaść u hramadstvie jak ciažkija nastupstvy — sprečny momant».
Ci mohuć być miedycynskaj tajamnicaj danyja pamierłaha čałavieka — taksama sprečnaje pytańnie, kaža Mačałaŭ. Pa jaho słovach, siarod advakataŭ niama adzinaj pazicyi pa hetym pytańni.
Mačałaŭ taksama nie razumieje, jak i za što siłaviki źbirajucca pryciahnuć da adkaznaści žurnalista.
Kamientary