«Kali sistema źmiała Kupałaŭski teatr, to što dla jaje my?» Rabotniki mahiloŭskaha teatra — pra zvalnieńnie kiraŭnika

Dyrektar dramatyčnaha teatra ŭ Mahilovie Andrej Novikaŭ nie zvolniŭ padnačalenych za vykazvańnie hramadzianskaj pazicyi. 25 listapada zvolnili jaho samoha. «Andrej Novikaŭ zastaŭsia ŭ hetaj situacyi čałaviekam ź vialikaj litary», — havorać u teatry.

24 listapada ŭ Mahiloŭskim dramteatry adbyŭsia ahulny schod, na jakim prysutničaŭ i Andrej Novikaŭ. Litaraturnaja redaktarka teatra Volha Siemčanka kaža, što abmierkavańnie išło burna, adzinaj stratehii nie było, u kožnaha — ułasnaje bačańnie situacyi dy jaje raźviazańnia, ale ŭsie kalehi chočuć viarnuć Novikava.

«Na hetym schodzie my padpisali zvarot da kiraŭnictva — upraŭleńnia kultury abłvykankama, kab Novikava viarnuli. Zvarot padpisali 86 pracaŭnikoŭ teatra. Kali dadzienaja prośba nie budzie zadavolenaja, kalektyŭ płanuje źviartacca vyšej», — paviedamiła Volha Siemčanka.

Niekatoryja ludzi vykazali žadańnie zvalniacca na znak salidarnaści z dyrektaram. Ale sam Novikaŭ ich adhavorvaŭ.

Volha Siemčanka była adnoj z tych, chto zaznaŭ pieraśled za hramadzianskuju pazicyju pa-za miežami teatra. Hetaj vosieńniu jaje niekalki razoŭ sudzili pavodle artykułu 23.34 KaAP — nibyta za ŭdzieł u mitynhach, i karali aryštam i štrafami.

«Na Novikava cisnuli, kab jon mianie taksama pakaraŭ, ale jon pryncypova nie ładziŭ nijakich represij u dačynieńni svaich pracaŭnikoŭ. Andrej Novikaŭ nie choča paŭtareńnia kupałaŭskaha scenaru, jon imkniecca zachavać kalektyŭ teatra. Niekatoryja vykazvajuć mierkavańnie, što Novikaŭ prynosić siabie ŭ achviaru, ale naš kalektyŭ nie choča prymać hetuju achviaru. Kaniečnie, ja asabista staŭlusia da situacyi tak, što heta ŭsio niapravilna. Kali my zhubim teatr, my zhubim usio.

Heta dakładna administracyjnyja represii. Čym bolš paharšajecca situacyja, tym macniejšyja hetyja represii. Chutka jany mohuć pierajści ŭ siłavyja. A skončycca ŭsio tolki tady, kali narod i zdarovy sens pieramohuć», — vykazałasia Volha Siemčanka.

Aktor i režysior Mahiloŭskaha dramatyčnaha teatra Uładzimir Piatrovič žadaje abaranić svajho dyrektara Andreja Novikava, ale pry hetym asablivych nadziejaŭ nie maje.

«Kali hetaja sistema źmiała Kupałaŭski teatr, to što dla jaje my? Ja nie prynižaju Mahiloŭski dramteatr, prosta baču, što my lacim pad katok aŭtamatam. My jašče nie viedajem, jak usio skončycca, ale dakładna adno: Andrej Novikaŭ zastaŭsia ŭ hetaj situacyi čałaviekam ź vialikaj litary, jon da kanca abaraniaŭ svaich supracoŭnikaŭ, jakich zaŭvažyli na mitynhach. Hetyja ludzi nie parušyli zakonu, ich niama za što zvalniać. Čałaviek razumny, sumlenny, prafiesijanał — heta ŭsio pra Novikava. I jon akazaŭsia nie patrebny našaj dziaržavie. Takimi krokami my ruchajemsia tolki ŭ adzin bok — u bok Paŭnočnaj Karei», — prakamientavaŭ situacyju Uładzimir Piatrovič.

• 0
• 0
• 0
• 0
• 0
• 0
• 0
• 0