Pad ciskam siłavikoŭ demanstracyi ŭ Minsku pieramiaścilisia ŭ dvarovyja terytoryi
Demanstranty znoŭ vyjšli na vulicy ŭ mikrarajonach Minska. Siłaviki adaptavali taktyku da rajonnych maršaŭ. Mabilnyja hrupy na mikraaŭtobusach kursiravali kala patencyjnych miescaŭ zboru i previentyŭna chapali ludziej na vulicach. U takich umovach bolšaść maršaŭ prajšła ŭ dvarovych zonach, tamu ahulnuju kolkaść udzielnikaŭ acanić niemahčyma.
Čytajcie taksama: U mikrarajonach siońnia prachodziać Maršy voli ANŁAJN
Miarkujučy pa videa, vialikija demanstracyi ŭ Minsku siońnia adbylisia ŭ Zavodskim rajonie («Šaryki»), Sucharavie — tam chadzili až čatyry kałony, Hrušaŭcy, na Staražoŭcy, Kamaroŭcy — tam ludzi skandavali «Łukašenku ŭ aŭtazak» i «Vierym, možam, pieramožam!». Značnaja kolkaść ludziej vyjšła na vulicy Piatryšak, Kałodziščaŭ (Minski rajon).
Šmatlikija zatrymańni znoŭ adbylisia ŭ mnohich rajonach. Asabliva staranna milicyja adpracoŭvała Uručča, Dambroŭku, bulvar Šaŭčenki, dzie ludnyja šeści adbylisia na minułych vychadnych. Siarod zatrymanych siońnia — lehiendarnaja Nina Bahinskaja, a taksama 79-hadovaja Łarysa Soŭś, viadomy paet i śpiavak Uładź Lankievič u Minsku, žurnalisty Marysia Charevič i Siarhiej Ludkievič u Hrodnie. Usiaho na hety momant viadomyja 62 imiony zatrymanych.
Siońnia zranku kala 4-ch hadzin hłušyli Telehram pa technałohii 9—12 žniŭnia, ale jon, jak i tady, byŭ lohka dastupny praz proksi. Prahlady navin u kanałach u vyniku pamienšali niaznačna. Heta aznačaje, što ŭ bolšaści karystalnikaŭ zahadzia ŭstanoŭlenyja proksi. Akramia taho, na niejki čas abmiažoŭvali dostup da mabilnaha internetu i vaj-faju.
Hałoŭnaja ž padzieja ŭ śviecie — pačatak masavaj vakcynacyi ad kavidu ŭ pieršych krainach śvietu, siarod jakich ZŠA, Brytanija, Kitaj, Rasija, Abjadnanyja Arabskija Emiraty. Vakcyny, praŭda, prajšli teściravańnie ŭ roznaj stupieni, i miedyki z chvalavańniem čakajuć vynikaŭ ich dziejańnia.
Kamientary