Viktar Marcinovič pra viartańnie Navalnaha: Pryjšoŭ čas pamianiacca z Rasijaj miescami

Ja nie z tych, chto dumaje, što Navalny nas čamuści moh navučyć.

Hieraizm Navalnaha dla mianie nie bolšy za hieraizm Babaryki, jaki išoŭ u prezidenty, dakładna viedajučy, što jaho zakryjuć. I pry tym mieŭ što stračvać.

Ci hieraizm Cichanoŭskaj, jakaja vyłučałasia prosta tamu, što jaje muža ŭžo zakryli.

Ale pry hetym ja ŭśviedamlaju, što padziei ŭ Šaramiećcievie buduć mieć vielizarnyja hieapalityčnyja nastupstvy.

Jakija zakranuć i našu krainu.

Navalny staŭ Navalnym tolki tamu, što Pucin — były padpałkoŭnik KDB SSSR — praz ułasny fors i pychu nie dazvalaŭ sabie z apanientami pavodzicca hetaksama prymityŭna, jak heta było pryniata ŭ našych beeseserach.

U nas Navalnaha źmiaścili b u astroh jašče paśla pieršaha hruntoŭnaha daśledavańnia FBK. I zakryli b na dziasiatku, nie dapuskali b advakataŭ, prybrali b z žyćcia i infarmacyjnaha pola.

Ułasna, u hetym byŭ niejki šarm, prykmieta «balšoha stylu» — Navalny nie čaplaŭ naŭprost Pucina, krytykujučy jaho atačeńnie, Pucin nie prybiraŭ Navalnaha.

Historyja ź viartańniem — heta imklivy daŭnhrejd rasijskich realij da Biełarusi-2020.

Taja ž nierašučaść.

Taja ž sproba spačatku zapluščyć vočy, potym «usich paviazać» i narešcie — prosta i tupa aryštavać samoha Navalnaha. Rejs ź Bierlina možna było adrazu nakiravać z Unukava na jaki-niebudź nikomu nie viadomy aeradrom. Ale ž nie, vahalisia, uzvažvali. Samalot kružlaŭ nad Maskvoj, čas išoŭ, kolkaść ludziej, jakija sačyli za pryhodami borta kampanii «Pieramoha» na «Daždžy», za hadzinu vahańniaŭ vyrasła z 220 da 400 tysiač.

Kožnuju chvilinu čakańnia palityčnaja vaha Navalnaha pavyšałasia.

I było adčuvańnie, što kali prybirajuć prychilnikaŭ, nie vypuskajuć ludziej na mašynach z Unukava — dyk, mabyć, daduć vyjści ŭ horad. Ale skončyłasia heta absalutna pa-biełarusku: zatrymańniem i nočču ŭ Chimkach, biez dopusku abaroncaŭ.

I zaraz Rasii treba budzie dalej prajści pa ściažyncy, što ŭsie hetyja hady praciareblivała Biełaruś.

Treba budzie vyjści z Rady Jeŭropy.

Bo tolki tady jana zdoleje nie źviartać uvahi na Jeŭrapiejski sud pa pravach čałavieka, jaki Navalnaha pa spravie «Iŭ Raše» apraŭdaŭ. Treba budzie zharnuć pradstaŭnictva ŭ mižnarodnych strukturach, jakija pa Navalnym nie prosta «zakłapočanaść» buduć vykazvać, ale ŭłasnyja jurydyčnyja rašeńni prapanoŭvać. I patrabavać ich vykanańnia.

My byli ŭ hetym punkcie ŭ 1997 hodzie. Mienavita tady, paśla palityčnaha kryzisu 1996-ha, PARE prypyniła dziejańnie statusu śpiecyjalna zaprošanaha dla Biełarusi.

I praz heta lubyja parušeńni pravoŭ i pracedur u našaj krainie nie paduładnyja nikomu, akramia tutejšych uładaŭ. Da taho ž ciapier daviadziecca pryjści i Rasii.

Rasija paśla hetaha skandalnaha zatrymańnia zojmie toje miesca ŭ jeŭrapiejskim paradku dnia, jakoje dahetul zajmała naša kraina.

Ale nie tolki vonkavyja nastupstvy tut pryncypovyja.

Jak ja kazaŭ raniej, 2021 hod stanie vielmi «haračym» dla našaj susiedki. I pačniecca ŭsio nie ŭ vieraśni, kali adbuducca dumskija vybary. Pačniecca ŭsio raniej.

Dy što tam, usio ŭžo pačynajecca.

Zatrymańnie zrabiłasia tym samym tryhieram, jakim — jak niechta ŭ Kramli bajaŭsia — nikoli b nie zrabiłasia viartańnie Navalnaha samo pa sabie.

Pratesnych akcyj pakul nie anansavali, ale jany buduć.

I, hledziačy pa tym uzdymie, jaki ŭnačy panavaŭ u Maskvie, heta buduć zusim novyja pa pamierach akcyi.

Rasijskaj palicyi daviadziecca i tut prajści pa biełaruskaj ściežcy. Nie daremna ž učora va Unukavie kryčali «Fašysty!» i śpiavali «Pieramien». I tak, tam pakul nichto nie stralaŭ pa natoŭpie humovymi kulami, ale sparadyčnyja zatrymańni «ni za što» ŭžo byli. Dalej treba budzie avałodać majsterstvam vybudovy sudovaha kanviejera — bo jak bieź jaho asudžać tych, kaho zatrymali «ni za što»?

Heta vymusić Pucina zusim pa-inšamu stavicca da biełaruskich raskładaŭ. I kali jašče ŭ Sočy jon moh nastojvać na kampramisie, reformach i vyrašeńni supiarečnaściaŭ praz dyjałoh, dyk ciapier jon jak daradca prosta pazbaŭlajecca hołasu. Na lubuju zaŭvahu možna budzie kazać «na siabie pahladzi».

U vyniku heta pryviadzie da vybudovy «internacyjanału kontrrevalucyjanieraŭ». Ja b navat nie vyklučaŭ viartańnia byłych ekanamičnych nišciakoŭ, bo heta naturalna — dapamahać sistemie, jakuju nienavidziać hetaksama, jak tvaju ŭłasnuju. Ale pierad hetym Rasiju zachłynie — moža, navat źjavicca adčuvańnie, što Łancełot abaviazkova pieramoža Drakona, «treba tolki padcisnuć jašče».

Dzie, u jakim śviecie, my akažamsia ŭ kancy 2021 hoda, ujavić ciažka. Vidavočna, što dazvolenaje maleńkaj krainie nichto nie budzie prabačać vielizarnaj dziaržavie ź jadziernaj zbrojaj. Vidavočna taksama, što Bajden — nie Tramp.

My ŭvieś 2020 hod adčuvali sabie hierojami, za dziejańniami jakich sočać u Rasii. Pryjšoŭ čas pamianiacca rolami.

• 0
• 0
• 0
• 0
• 0
• 0
• 0
• 0