Rasijski «Kamitet suprać katavańniaŭ» i Suśvietnaja arhanizacyja suprać katavańniaŭ 26 studzienia apublikavali dakład, pryśviečany hvałtu z boku siłavikoŭ u dačynieńni da pratestoŭcaŭ.
U 46-staronkavym dakumiencie pad nazvaj «Kalidor dubinak» — šlach biełaruskich uładaŭ. U dakładzie ab milicejskim hvałcie apisvajucca spravy 13 čałaviek, jakija padvierhlisia hvałtu z 9 pa 13 žniŭnia 2020 hoda, źviartaje ŭvahu Tut.by.
Dakład byŭ zasnavany na rasśledavańni, praviedzienym jurystami Kamiteta suprać katavańniaŭ.
Na śpiecyjalnym sajcie apisany historyi kožnaha z paciarpiełych — z fotazdymkami źbićcia, z vytrymkami z epikryzaŭ, z aŭdyjo- i videaśviedčańniami. 10 čałaviek nie chavajuć svaje imiony. U niekatorych vypadkach imiony źmienienyja. Mnohija ź ich ŭtrymlivalisia ŭ izalatary časovaha ŭtrymańnia i centry izalacyi pravaparušalnikaŭ u zavułku Akreścina ŭ Minsku.
- Historyja Hanny Saroki
- Historyja kamiery № 19
- Historyja Alaksandra Bruchančyka
- Historyja Alaksandra Iljasieviča
- Historyja Alesia
- Historyja Mikałaja Navasielskaha
- Historyja Vitala Prakopjeva
- Historyja Antona Radoŭskaha
- Historyja Ihara Stankieviča
- Historyja Arcioma Bialaja
- Historyja Siarhieja Mieljanca
- Historyja Mikity Špakoŭskaha
— Bolšaść z paciarpiełych byli vymušanyja prajści praz «kalidory», kali supracoŭniki pravaachoŭnych orhanaŭ vystrojvalisia ŭ dźvie šarenhi, kab nanosić udary dubinkami prabiahajučym pamiž imi zatrymanym, — apisvajecca na sajcie pravaabaroncaŭ. — Tak, u adnaho čałavieka ad udaraŭ była razarvanaja barabannaja pieraponka, niekalki inšych atrymali roznyja pierałomy. Niekatoryja paciarpiełyja paviedamili pra seksualny hvałt ci pahrozy seksualnaha charaktaru i prynižeńni. Inšyja zamachi z boku pravaachoŭnikaŭ uklučali ŭ siabie šmathadzinnaje znachodžańnie zatrymanych u nienaturalnych pozach, a taksama ŭtrymańnie ŭ pierapoŭnienych kamierach biez vady i ježy. Bolšaść z hetych trynaccaci čałaviek byli minakami, jakija nie brali ŭdziełu ŭ akcyjach pratestu suprać pieravybrańnia Łukašenki.
Da 9 vieraśnia 2020 hoda, pavodle aficyjnych źviestak, u Śledčy kamitet Biełarusi pastupiła bolš za 1800 skarhaŭ ad hramadzian na katavańni i niezakonnaje ŭžyvańnie fizičnaha hvałtu z boku pravaachoŭnikaŭ. Pa stanie na 31 śniežnia 2020 hoda ŭ dačynieńni da supracoŭnikaŭ pravaachoŭnych orhanaŭ nie było zaviedziena nivodnaj kryminalnaj spravy.
U dakładzie pryvodzicca padrabiaznaja infarmacyja ab tym, jak ułady ŭsialak sabatujuć praviadzieńnie efiektyŭnaha rasśledavańnia skarhaŭ hramadzian pad prykryćciom farmalnaha vykanańnia zakona. Naprykład: zaviadzieńnie kryminalnych spraŭ u dačynieńni da hramadzian, što paskardzilisia na katavańni, pieraškoda advakatam u pradstaŭleńni intaresaŭ paciarpiełych, pazbaŭleńnie niekatorych ź ich advakackich licenzij i navat zaviadzieńnie suprać ich kryminalnych spraŭ, abjadnańnie sotniaŭ spraŭ u adnu i nieabhruntavanaje prypynieńnie rasśledavańnia.
— Padčas rasśledavańnia našy rasijskija kalehi vyjavili mnostva roznych pryčyn, jakija vykarystoŭvajucca aficyjnymi orhanami Biełarusi dla faktyčnaj admovy rasśledavać fakty aburalnych pavodzinaŭ supracoŭnikaŭ siłavych struktur, — zajaviŭ hienieralny sakratar Suśvietnaj arhanizacyi suprać katavańniaŭ Hierald Stabierok. — Toje, što my nazirajem, — heta palityčna matyvavanaja admova ŭ pravasudździ. Uličvajučy adsutnaść niezaležnaha rasśledavańnia ŭnutry krainy, my ličym, što nastaŭ čas dla stvareńnia mižnarodnaha orhana, jaki b zaniaŭsia rasśledavańniem maštabnych parušeńniaŭ pravoŭ čałavieka ŭ Biełarusi.
— Supracoŭniki pravaachoŭnych orhanaŭ aktyŭna ŭžyvali siłu ŭ dačynieńni da ŭžo zatrymanych asob, jakija nie pradstaŭlali nijakaj pahrozy i nie akazvali nijakaha supracivu, — kaža juryst Kamiteta suprać katavańniaŭ Dźmitryj Kazakoŭ. — Vidavočna, što metaj było zapałochvańnie, prynižeńnie i pakarańnie ludziej za ŭdzieł u demanstracyjach, jakija nasili pieravažna mirny charaktar. Sabranyja dokazy śviedčać pra naŭmysnyja akty žorstkaha abychodžańnia.
Kamientary