Akcyi suprać Pucina ŭ Rasii: centr Maskvy pierakryty, bolš za 4000 zatrymanych pa ŭsioj krainie
Na akcyi suprać karupcyi i za Navalnaha vyjšli tysiačy ludziej pa ŭsioj Rasii.
Pieršyja akcyi pačalisia ŭ Sibiry i na Dalokim Uschodzie Rasii. Kala tysiačy ludziej vyjšła ŭ Novasibirsku i Irkucku. Na centralnaj płoščy Jakucka niekalki dziasiatkaŭ pratestoŭcaŭ sabralisia navat u sarakahradusny maroz. Va Uładzivastoku palicyja vycisnuła ludziej z centra, i jany zładzili karahod na lodzie Amurskaha zaliva. Da ich vysunuŭsia kater na pavietranaj padušcy z palicejskimi, ale zahłuch pobač z pratestoŭcami, paviedamlaje «Mieduza».
Zatrymańni prachodziać u Krasnajarsku, Barnaule, Novasibirsku. Zatrymanyja 13 čałaviek u centry Chabaraŭska. Usiaho pa Rasii zatrymanyja ŭžo bolš za 500 čałaviek.
U Maskvie i Sankt-Pieciarburhu vyjšli sotni ludziej, iduć masavyja zatrymańni.
Palicyja pierakryła dla piešachodaŭ centralnyja vulicy Maskvy i zakryła na ŭvachod i vychad siem stancyj mietro.
Akramia taho, u niadzielu ŭ centry Maskvy buduć začynienyja kaviarni, restarany i kramy. Nielha budzie kupić ałkahol i napoi ŭ šklanoj tary z 09:00 da 23:00.
Kala administracyjnych budynkaŭ vystaŭlenyja aharodžy.
Kamanda Navalnaha anansavała akcyi ŭ 142 haradach Rasii.
Alaksieja Navalnaha zatrymali 17 studzienia ŭ aeraporcie Šaramiećcieva, kali jon viarnuŭsia ŭ Rasiju ź Niamieččyny, dzie lačyŭsia paśla atručvańnia rečyvam z hrupy «Navičok».
Navalnaha zatrymali na patrabavańnie Fiederalnaj słužby vykanańnia pakarańniaŭ (FSVP), jakaja nastojvaje na tym, kab jamu zamianili ŭmoŭny termin pa spravie «Iŭ Raše» (try z pałovaj hady) na realny. Pasiadžeńnie suda pa zajavie FSVP pryznačyli na 2 lutaha.
Kamientary