Subpadradčykaŭ biełaruskaj kampanii padazrajuć u tym, što žyŭcom zasypali ludziej ziamloj u Zimbabve
Pra strašnuju trahiedyju, da jakoj moža być datyčnaja kampanija ź Biełarusi (jakaja mienavita kampanija, pakul nie nazyvajecca), paviedamiŭ Centr kiravańnia pryrodnymi resursami Zimbabve. Pa jaho źviestkach, u šachtach niedaloka ad horada Mutare byli žyŭcom pachavanyja šachciory-samatužniki, jakija biez dazvołu šukali zołata. Raspracoŭkaj terytoryi zajmałasia biełaruskaja kampanija — subpadradčykam vystupała kitajskaja kampanija Zhondin Investments. Incydent adbyŭsia ŭ pieryjad z 11 pa 13 listapada 2020 hoda.
Na miescy trahiedyi ŭžo znajšli dva cieły šachcioraŭ-samatužnikaŭ, jašče kala 10 ličacca źnikłymi bieź viestak.
Pa słovach vidavočcaŭ, kitajskaja subpadradnaja kampanija naŭmysna zasypała šachty šachcioraŭ-samatužnikaŭ, całkam uśviedamlajučy, što pad ziamloj znachodziacca ludzi. Pry hetym paviedamlajecca, što za hetym nazirali ŭzbrojenyja supracoŭniki palicyi Respubliki Zimbabve, jakija zabiaśpiečvali biaśpieku dziejnaści kampanii.
Palicyja śćviardžaje, što jany nie ŭpeŭnienyja, čym zajmałasia kampanija: mielijaracyjaj ziamiel ci zdabyčaj karysnych vykapniaŭ. Nie było pryniata dastatkovych mier zaściarohi, kab pierakanacca, što ŭ šachtach niama šachcioraŭ-samatužnikaŭ.
Abiedźvie kampanii i palicyja Respubliki Zimbabve adchilili śćvierdžańni ab tym, što cieły šachcioraŭ-samatužnikaŭ jašče znachodziacca pad ziamloj, niahledziačy na toje, što na ziamli zastalisia ich adzieńnie i asabistyja rečy.
Centr kiravańnia pryrodnymi resursami źviarnuŭsia va ŭrad Zimbabve z patrabavańniem spynić vydaču dazvołaŭ na zdabyču karysnych vykapniaŭ karparacyi, jakaja parušaje kanstytucyjnyja pravy jaje hramadzian.
Samatužnaja i drobnamaštabnaja zdabyča karysnych vykapniaŭ nie ŭzakoniena ŭ Afrycy, choć zabiaśpiečvaje srodki da isnavańnia dla mnohich ludziej. I ŭ toj ža čas hety vid dziejnaści praciahvaje nieści vialikuju niebiaśpieku, štohod zabirajučy nieźličonuju kolkaść žyćciaŭ.
Ciapier čytajuć
Suśvietnaja zorka Džejsan Deruła zajechaŭ u Biełaruś. Premjer Turčyn vadziŭ jaho pa Domie ŭrada6
Kamientary