U Kitai represujuć žurnalistaŭ, jakija ŭ sacsietkach paviedamlali pra realnyja nastupstvy karanavirusa

Kali letaś va Uchani pačałasia ŭspyška karanavirusa, mnohija maładyja žychary nie daviarali infarmacyi ź dziaržaŭnych ŚMI. Zamiest hetaha jany źviarnulisia da sacyjalnych sietak. Kala 10 žurnalistaŭ i błohieraŭ z Uchania zdymali videa na smartfony, kab zadakumientavać rannija stadyi pandemii, piša DW.

Biez hetych źviestak mnohija detali, jakija kitajskamu ŭradu było vyhadna nie raznosić, imavierna, tak i nie byli b abnarodavanymi.

Adnak navat heta prajava svabody słova ŭ sacyjalnych sietkach budzie abmiežavanaja. Ciapier usie pasty žurnalistaŭ u sacsietkach buduć aceńvacca, nakolki jany źjaŭlajucca palityčna prymalnymi. Heta acenka budzie paśla vykarystoŭvacca dla taho, kab vyrašyć, ci padaŭžać tym ci inšym žurnalistam akredytacyju.

Pa zajavie Hałoŭnaha kiraŭnictva druku i publikacyj Kitaja (General Administration of Press and Publication) ad 19 studzienia, meta takoha rašeńnia ŭ tym, kab «realizavać važnyja idei hienieralnaha sakratara Si Czińpina pa prapahandzie i ideałahičnaj pracy i stvaryć kamandu žurnalistaŭ, jakija źjaŭlajucca palityčna mocnymi i inavacyjnymi, a taksama prytrymlivajucca realistyčnych pohladaŭ».

Novaje rehulavańnie zakranie radyjo, telebačańnie, drukavanyja i internet-ŚMI. Toj, chto budzie najmać žurnalistaŭ biez akredytacyi, budzie padviarhacca pakarańniu. Takija źmieny, jakija mohuć padacca niaznačnymi, vierahodna, buduć mieć doŭhaterminovyja nastupstvy.

Kitajskija ŚMI zaŭsiody imknucca realizavać svabodu słova ŭ aŭtarytarnym asiarodździ krainy. Heta ŭklučaje ŭ siabie vykarystańnie sacsietak dla repartažaŭ na temy, jakija nie vyklikajuć adabreńnia ŭ dziaržaŭnych cenzurnych orhanaŭ.

Taksama pad kantrol voźmuć karystalnicki kantent, jaki publikujuć ludzi biez žurnalisckaj adukacyi.

Niekatoryja z žurnalistaŭ Uchania ŭžo sutyknulisia z represijami za svaju prafiesijnuju dziejnaść. 37-hadovy videabłohier Čžan Čžań (Zhang Zhan) atrymaŭ 4 hady aryštu. Jašče dvoje žurnalistaŭ zastajucca pad aryštam. A miescaznachodžańnie reparciora Fan Binia (Fang Bin) nieviadoma ź lutaha 2020 hoda.

Paśla taho, jak Si Czińpin uznačaliŭ dziaržavu, cenzura ŭ Kitai značna ŭzmacniłasia.

Jašče adnoj novaj padziejaj stała ŭzmacnieńnie represij suprać kitajskich karystalnikaŭ zamiežnych płatform Twitter i Facebook, jakija ŭ Kitai dastupnyja tolki z VPN. Za apošnija try hady bolš za 50 kitajskich hramadzian aryštavali za vykarystańnie hetych sacsietak dla vykazvańnia svajho mierkavańnia nakont pratestaŭ u Hankonhu, statusu Tajvania i parušeńnia pravoŭ čałavieka ŭ Sińcziani.

• 0
• 0
• 0
• 0
• 0
• 0
• 0
• 0