Rasijskaje vydańnie «Kommiersant'» piša, što na mahčymaj sustrečy Alaksandra Łukašenki i Uładzimira Pucina ŭ Sočy, što maje prajści da kanca lutaha, baki mohuć zakranuć temy novaha rasijskaha kredytu — hetym razam $3 młrd. Pry hetym farsiravać padtrymanuju Maskvoj kanstytucyjnuju reformu i zrezać prezidenckija paŭnamoctvy Łukašenka nie maje namieru.
Pavodle krynic vydańnia, daty pieramovaŭ — 22 i 25 lutaha, a miescam ich praviadzieńnia abrany horad Sočy. Dva kiraŭniki apošni raz sustrakalisia tam 14 vieraśnia minułaha hoda, u razhar pratestaŭ u Biełarusi, i tady spadar Łukašenka pavioz dadomu damoŭlenaść ab pradastaŭleńni Minsku rasijskaha kredytu ŭ $1,5 młrd.
Biełaruski bok, kažuć infarmavanyja krynicy ŭ rasijskim uradzie, chacieŭ by atrymać dostup da rešty srodkaŭ, vydzielenych Maskvoj na budaŭnictva Biełaruskaj AES.
Surazmoŭcy «Kommiersanta» kažuć, što havorka idzie pra sumu, jakaja pieravyšaje $3 młrd.
U 2011 hodzie była dasiahnuta damoŭlenaść ab vydzialeńni Rasijaj dziaržaŭnaha kredytu Biełarusi ŭ 10 młrd na budaŭnictva stancyi. Na kaniec vieraśnia 2020 hoda Minsk vykarystaŭ ź ich tolki $4,5 młrd, paviedamlaŭ rasijski Minfin.
Adzin z surazmoŭcaŭ adznačyŭ, što baki «blizkija da dasiahnieńnia damoŭlenaści pa vydzialeńni srodkaŭ», dadaŭšy, što pracenty, terminy i pamier sumy abmiarkoŭvajucca. Pry hetym jon adznačyŭ, što pamier kredytu «bolšy za $3 młrd».
Sa słoŭ inšaj infarmavanaj krynicy, Minsk moža atrymać ad $3 młrd da $3,5 młrd. Pryčym pytańnie, pavodle jaho źviestak, pryncypova ŭžo vyrašana. Nie vyklučana, što kančatkova damoŭlenaść moža być aformlena padčas sustrečy.
Kamientary