Prakuror prosić dva hady kałonii dla Natalli Rajentavaj, jakaja ŭkusiła siłavika za ściahno ŭ tralejbusie
Zatrymańnie adbyłosia ŭ subotu, 29 žniŭnia, paśla žanočaha maršu. Natalla padčas zatrymańnia ŭkusiła siłavika za ściahno. Spravu kvalifikavali pa artykule 364 KK — hvałt u dačynieńni da supracoŭnika AMAPa. Svaje pakuty milicyjanier rascaniŭ u dźvie tysiačy rubloŭ, paviedamlaje spring96.org.
Natalla vinu nie pryznaje. Spravu razhladaje sudździa Taćciana Akavitaja.
Na treci dzień sudovaha raźbiralnictva pa hetaj spravie, 11 listapada, pa chadajnictvie abarony Natalli Rajentavaj dziaŭčynu adpravili na sudova-psichałahičnuju ekśpiertyzu, kab ustanavić, ci nie znachodziłasia jana padčas ukusu ŭ stanie afiektu i ci ŭśviedamlała jana svaje dziejańni ŭ toj momant u poŭnaj miery.
Sud Centralnaha rajona pastaviŭ pierad Upraŭleńniem sudova-psichijatryčnych ekśpiertyz UHKSE 11 pytańniaŭ ab psichałahičnym stanie Rajentavaj 29 žniŭnia.
Praz bolš za try miesiacy, 23 lutaha, sud pa hetaj spravie adnaviŭsia: ekśpiertyzu narešcie praviali.
«Rajentava ŭ pieryjad času, jaki adnosicca da ździajśnieńnia inkryminavanaha joj dziejańnia, nie znachodziłasia ŭ stanie afiektu ci inšym emacyjnym stanie, jaki pazbaŭlaŭ jaje zdolnaści ŭ poŭnaj miery ŭśviadomić značeńnie svaich dziejańniaŭ i kiravać imi», — pryjšli da vysnovy ekśpierty.
Abviaščeńnie prysudu pryznačanaje na 24 lutaha.
Čytajcie taksama:
«Nie było času kazać, čamu zatrymlivajem». Pačaŭsia sud nad dziaŭčynaj, jakaja ŭkusiła amapaŭca
Brat Natalli Alaksandr, jaki byŭ zatrymany razam ź joj, ciapier znachodzicca ŭ SIZA ŭ Žodzinie. Na ŭsich pracesach siastry jon raniej prysutničaŭ, ale ŭ pačatku śniežnia jaho zatrymali samoha ŭ miežach kryminalnaj spravy.
«Padrabiaznaści mnie nieviadomyja, śledčy ŭ razmovie spasłaŭsia na tajamnicu śledstva. Viedaju tolki, što znajšli niejkaje fota, dzie Saša na «płoščy Pieramien», zabrali jaho ŭ pačatku śniežnia, pryjšli za im dadomu i pavieźli», — patłumačyła Luboŭ Rajentava, maci Alaksandra i Natalli.
Kamientary