Izrail z 8 sakavika dazvoliŭ ujezd niekatorym katehoryjam zamiežnikaŭ. Napiaredadni ŭłady taksama źniali zabaronu na viartańnie izrailcian u krainu. U nastupnyja tydni im budzie addavacca pryjarytet na ŭjezd, pakolki 23 sakavika ŭ Izraili projduć daterminovyja parłamienckija vybary, piša RBK.
Ujezd dla zamiežnikaŭ budzie abmiežavany. U nastupnyja dva tydni jon budzie dazvoleny tolki: mužam (žonkam) abo baćkam hramadzianina abo rezidenta Izraila; prafiesijnym spartsmienam, jakija nakiroŭvajucca na spabornictvy; asobam, čyja dziejnaść maje žyćciova važnaje značeńnie dla źniešniaj palityki ci nacyjanalnaj biaśpieki Izraila, a taksama tym, chto imihruje i nie moža źmianić datu svajoj imihracyi, i zamiežnym rabočym. Za 24 hadziny da vyletu zamiežnyja hramadzianie pavinny buduć padać anłajn-zajavu, jakuju razhledziać ułady.
Studenty i vałanciory zajechać u krainu da 27 sakavika nie zmohuć.
Toj, chto prybyŭ u Izrail, abaviazany syści na dvuchtydniovy karancin. Kab trapić na samalot, hramadzianie pavinny pradjavić admoŭny vynik PŁR-testu, zroblenaha na praciahu 72 hadzin da vyletu.
Izrail asłablaje abmiežavańni, uviedzienyja z-za karanaavirusa, na fonie masavaj vakcynacyi. Raniej u krainie tym, chto atrymaŭ abodva kampanienty vakcyny, dazvolili naviedvać spartyŭnyja zały, basiejny, spartyŭnyja i kulturnyja mierapryjemstvy i kirmašy.
Izrail — suśvietny lidar pa vakcynacyi ad karanavirusa. Pavodle źviestak trekiera Bloomberg, u krainie ŭviali 8,7 młn doz vakcyny, a na 100 žycharoŭ u siarednim prypadaje 96,01 dozy.
Dla paraŭnańnia, u ZŠA na 100 čałaviek prypadaje 27,21 dozy, u Vialikabrytanii — 34,93, u Rasii — 5,11, u Biełarusi — 0,22, u Polščy — 10, u Litvie — 11, va Ukrainie — 0,041.
Pieršuju dozu atrymali 54,6% nasielnictva Izraila, dźvie — 41,4%.
Kamientary