Važnyja źmieny: ciapier paśla afarmleńnia navat drobnaha DTZ mohuć zabrać pravy na 2 hady
Partał Onliner.by źviarnuŭ uvahu na važnyja źmieny ŭ Kodeksie ab administratyŭnych pravaparušeńniach. Jany ŭstupili ŭ siłu 1 sakavika 2021, ale zastalisia niezaŭvažanymi. Ciapier kožnaja drobnaja avaryja pahražaje kiroŭcu pazbaŭleńniem pravoŭ — ale tolki ŭ vypadku, kali na miesca pryjechała DAI. Kali ž kiroŭcy razyšlisia z afarmleńniem jeŭrapratakoła, to pakarańnia nie budzie.
Jak było da 2018 hoda?
Pryjechaŭšy na miesca zdareńnia, daišniki pytalisia ŭ paciarpiełaha, ci prosić jon surovaha pakarańnia dla vinavataha. Kali ŭ pratakoł zanosiłasia takaja paznaka, kiraŭnictva DAI vyklikała vinavataha na razhlad, dzie prymałasia rašeńnie, ci zabrać pravy, ci abmiežavacca štrafam.
Jak było ŭ 2018-2021?
U zakanadaŭstva ŭnieśli źmieny. DAI pryjazdžała na miesca zdareńnia i štrafavała vinavataha kiroŭcu tolki za toje parušeńnie, jakoje pryviało da avaryi — naprykład, za prajezd na čyrvonaje śviatło abo parušeńnie praviłaŭ manieŭravańnia. Dadatkovaha pakarańnia być nie mahło.
Jak stała z 1 sakavika 2021?
Źmianiłasia aznačeńnie «avaryjnaj abstanoŭki». Ciapier pad joj razumiejuć nie tolki vymušanuju źmienu chutkaści ci kirunku ruchu, ale i absalutna luboje paškodžańnie aŭtamabila. Tamu kali DAI afarmlaje luboje zdareńnie, na kiroŭcu składajuć pratakoł i za pryčynu avaryi (toj samy prajezd na čyrvonaje), i za stvareńnie avaryjnaj abstanoŭki. A heta dadatkovy štraf pamieram ad 5 da 20 bazavych vieličyń z mahčymaściu pazbavić pravoŭ na 2 hady.
Pry hetym dla vinavataha ŭ zdareńni pa-raniejšamu zachoŭvajecca mahčymaść paźbiehnuć dadatkovaha pakarańnia — damovicca z paciarpiełym na jeŭrapratakoł. Kali DAI nie pryjedzie na afarmleńnie, to i karać nikoha nie zmoža.
Nahadajem, jeŭrapratakoł možna składać, kali:
- U avaryi ŭdzielničali tolki dźvie mašyny.
- Abodva kiroŭcy ćviarozyja, z pravami i sa strachoŭkami.
- Niama škody zdaroŭju kiroŭcaŭ.
- Vinavaty pryznaje svaje vinu.
- Pamier škody nie pieravyšaje 800 jeŭra.
Ciapier čytajuć
Ad pryvatnikaŭ patrabujuć zavieści ideołaha ŭ štacie — raspytali, što robiać kampanii11
Kamientary