Cichanoŭskaja vystupiła na anłajn-słuchańniach Kanhresa ZŠA. Voś što jana raskazała
U Kamitecie pa mižnarodnych adnosinach Pałaty pradstaŭnikoŭ Kanhresu ZŠA adbylisia słuchańni ŭ pytańni demakratyčnaha ruchu ŭ Biełarusi i liderstva žančyn. Na onłajn-słuchańniach u jakaści śviedki vystupiła Śviatłana Cichanoŭskaja, a pravioŭ ich kanhresmen Bił Kitynh, kiraŭnik padkamitetu pa Eŭropie, enerhietycy, navakolnym asiarodździ i kiberbiaśpiecy, paviedamlaje «Radyjo Svaboda».
- Kanhresmen Kitynh nahadaŭ abstaviny vybaraŭ u Biełarusi ŭ žniŭni 2020 hodu. Jon adznačyŭ, što Alaksandar Łukašenka vidavočna prajhraŭ vybary i ŭžyŭ brutalnyja represii, kab utrymacca va ŭładzie. Kitynh padkreśliŭ važnuju rolu, jakuju adhryvajuć biełaruskija žančyny, u tym liku Śviatłana Cichanoŭskaja, u zmahańni z dyktaturaj.
- Kitynh nahadaŭ tyja kroki, jakija zrabili ZŠA ŭ padtrymku demakratyčnaha ruchu ŭ Biełarusi, u pryvatnaści pryniaty Kanhresam «Akt ab demakratyi, pravach čałavieka i suverenitecie Biełarusi». Jon padkreśliŭ, što asnoŭnuju pracu dla demakratyzacyi Biełarusi robiać ludzi ŭ samoj krainie, a taksama biełaruskaja dyjaspara pa ŭsim śviecie.
- Aŭtar «Aktu ab demakratyi, pravach čałavieka i suverenitecie Biełarusi» kanhresmen Krystafer Śmit adznačyŭ, što Rasieja hladzić na Biełaruś z tymi ž namierami, ź jakimi hladzieła na Krym i Ŭkrainu.
- Śmit zhadaŭ šmatlikija palityčna matyvavanyja kryminalnyja spravy suprać biełaruskich žančyn.
- Śviatłana Cichanoŭskaja pačała svoj vystup z taho, što choča dać hołas tym biełarusam, jakija dahetul praciahvajuć pratestavać. Jana padkreśliła, što nivodny pradstaŭnik režymu nie panios adkaznaści za złačynstvy, pry tym što zahinuli nia mienš za 8 udzielnikaŭ pratestaŭ. U pryvatnaści, jana raskazała pra zabitaha siłavikami Alaksandra Tarajkoŭskaha.
- Cichanoŭskaja raskazała pra ŭdzielnic pratestu, nazvaŭšy Ninu Bahinskuju, Volhu Chižynkovu i Alenu Leŭčanku, i pra toje, jak jany paciarpieli ad režymu.
- Jana taksama raskazała pra žurnalistak Kaciarynu Andrejevu i Darju Čulcovu, źniavolenych za svaju pracu.
- «Ludzi pakutujuć i pamirajuć prosta ciapier. Biełarusy patrabujuć vašaj dapamohi, jak nikoli raniej», — zaviaršyła Cichanoŭskaja svoj vystup.
- Adkazvajučy na pytańni kanhresmenaŭ, Cichanoŭskaja padkreśliła, što Biełarusi treba novyja svabodnyja i spraviadlivyja vybary. Niahledziačy na biesprecendentny ŭzrovień hvałtu z boku ŭłady, ludzi praciahvajuć zmahacca, ale im treba mižnarodnaja dapamoha i mižnarodny cisk na režym, skazała Cichanoŭskaja.
- Cichanoŭskaja taksama raskazała, što jana štodnia kamunikuje ź ludźmi ŭnutry Biełarusi.
- Adkazvajučy na pytańnie kanhresmena Śmita, Cichanoŭskaja zaklikała da bolšaha cisku i da macniejšych sankcyj suprać režymu. Jana prapanavała pašyryć śpisy dla persanalnych sankcyj, najpierš za košt siłavikoŭ, a taksama ŭvieści sankcyi suprać kampanij, ad jakich Łukašenka atrymlivaje hrošy.
- Jana zaklikała amerykanskich kanhresmenaŭ patrabavać vyzvaleńnia źniavolenych žurnalistaŭ, padtrymać hramadzianskuju supolnaść Biełarusi, biełaruskija demakratyčnyja kanały na Youtube i Telegram, a taksama medyi, jakija pracujuć u Biełarusi.
- Cichanoŭskaja vykazałasia za toje, kab ambasadarka ZŠA Džuli Fišer pryjechała ŭ Biełaruś i pasprabavała naviedać palitviaźniaŭ i palityčnyja sudy, kab na svaje vočy pabačyć nialudzkija ŭmovy ŭtrymańnia i adsutnaść zakonu. Pry hetym, adnak, vielmi važna, kab Fišer nie ŭručała davierčych listoŭ Alaksandru Łukašenku, kab nijakim čynam nie spryjać uražańniu, što toj — lehitymny kiraŭnik, skazała Cichanoŭskaja.
- Pavodle Cichanoŭskaj, biełarusy hatovyja padtrymać novyja sankcyi suprać režymu, navat kali heta adabjecca na ich ułasnym dabrabycie, bo jany pakutujuć ad dziejańniaŭ režymu.
Kamientary