Čarhovy «dopyt» Hładkaj: dziaŭčyna vymušanaja apraŭdvacca, što razmaŭlaje pa-biełarusku
25 sakavika pa telehram-kanałach šyroka razyšłosia videa, na jakim vidać, jak padčas hutarki intervjujera ź Ninaj Bahinskaj na zadnim płanie amapaŭcy vychoplivajuć dziaŭčynu z fotaaparatam.
Užo ŭ RUUSie prapahandystka z «SB» Ludmiła Hładkaja zapisała razmovu z zatrymanaj.
Jaje zavuć Maryja Cichanava, joj 23 hady, jana rodam z Mahilova. Dziaŭčyna navučajecca ŭ maskoŭskim Instytucie sučasnaha mastactva pa śpiecyjalnaści «Režysura kino i telebačańnia» i ŭ Minsku zdymaje kursavuju pracu, pryśviečanuju žančynam u sučasnych realijach. Centralnaj asobaj svajoj raboty Maryja abrała Ninu Bahinskuju.
Hładkaja zadała Cichanavaj kala 10 pytańniaŭ, i heta byli pytańni, ułaścivyja milicejskamu dopytu: niešta z najezdam, niešta z žadańniem padłavić paddopytnaha.
- Što vy robicie ŭ Minsku?
- Čamu ŭ Minsku?
- U Maskvie niama sučasnych žančyn?
- Kaho vy tam zdymajecie?
- Čamu mienavita Bahinskaja?
- Nu jana ž nie vielmi sučasnaja žančyna?
- A jak vy apynulisia pobač ź joj u hety čas?
- Čamu mienavita ŭ hetym punkcie?
- Dzie vy čytajecie naviny?
- Jakija telehram-kanały?
Adzinaccatym pytańniem stała toje, čamu Cichanava razmaŭlała z hierainiaj pa-biełarusku.
«Na videa, — ščyra kažučy, my jaho troški pahladzieli, — tam čuvać, što havorycie na biełaruskaj movie…» — ździviłasia Hładkaja.
«Tak, kaniečnie, bo ja ź Biełarusi, z Mahilova, raniej vučyłasia ŭ Minsku i biełaruskaja mova maja rodnaja», — ščyra adkazała Maryja Cichanava.
26 sakavika sudździa Centralnaha suda horada Minska Dźmitryj Karsiuk aryštavaŭ studentku z Maskvy na 15 sutak.
Ciapier čytajuć
Zahinuŭ biełaruski dobraachvotnik Vasil «Dzir» Rapicki11
Kamientary