U Kobrynie asudzili žančyn za ŭpryhožvańnie parku napiaredadni Dnia Voli
U Kobrynie 26 sakavika asudzili čaćviarych žančyn za ŭpryhožvańnie haradskoha parku imia Alaksandra Suvorava napiaredadni Dnia Voli, pieradaje «Novy Čas».
Sudździa Vadzim Zdanovič pakaraŭ 7 sutkami aryštu doktarku-piedyjatra Juliju Rafałovič, štrafam u 10 bazavych vieličyń — piensijanierak Ludmiłu Biełavusavu, Volhu Aleksijuk i Inu Sudžum.
Usie jany paśla zatrymańnia abjavili haładoŭku. Z momantu źniavoleńnia da abiedu 26 sakavika kobrynki znachodzilisia ŭ izalatary časovaha ŭtrymańnia miascovaha RAUS. Šmatdzietnuju maci Marynu Žuk, jakuju paśla zatrymańnia vyzvalili, buduć sudzić paźniej.
Maryna Žuk
Supracoŭniki kryminalnaha vyšuku Kobrynskaha RAUS Uładzisłaŭ Śvityč i Uładzisłaŭ Kabarycha zatrymali žančyn 24 sakavika paśla 23 hadziny padčas špacyru ŭ parku. Hramadziankam inkryminavali raspaŭsiud bieł-čyrvona-biełych stužak i ŭlotak z zaklikam «Kobryn, vychodź! Biełaruś budzie volnaj!», a taksama fatahrafavańnie hetych ulotak. Razam z tym, milicyjanty kanfiskavali ŭ zatrymanych pakiet papiarovych cylindraŭ biełaha koleru z čyrvonaj pałasoj.
Svaje dziejańni žančyny matyvavali žadańniem upryhožyć park napiaredadni Dnia Voli. Pryčym Julija Rafałovič źviarnuła ŭvahu suda na toje, što ich zatrymlivali supracoŭniki RAUS u cyvilnym, jakija nie nazvalisia, a taksama na toje, što ŭmovy ŭtrymańnia ŭ IČU prynižajuć čałaviečuju hodnaść. Paśla ahałošvańnia prysudu spadarynia Julija napisała zajavu na adterminoŭku administracyjnaha aryštu ŭ suviazi sa słužbovaj nieabchodnaściu, adnak Vadzim Zdanovič nie zadavoliŭ zajavu doktarki.
Kala 20 čałaviek pryjšło da budynka Kobrynskaha rajonnaha suda, kab padtrymać svaich ziamlačak.
Ciapier čytajuć
Adstaŭny padpałkoŭnik milicyi adsudziŭ kvateru ŭ svajoj dački. Hučnaja siamiejnaja historyja z Bresta7
Kamientary