Mastak Aleś Puškin: Ministr zamiežnych spraŭ Ukrainy ŭhavorvaŭ zastacca, ale ja nie z tych, chto biažyć za miažu
26 sakavika Hienieralnaja prakuratura zaviała kryminalnuju spravu suprać mastaka Alesia Puškina i mieniedžara kultury Paŭła Mažejki.
Heta adbyłosia praz toje, što na vystavie ŭ haradzienskim Centry haradskoha žyćcia demanstravaŭsia partret antysavieckaha padpolščyka z Pastaŭskaha rajona Aŭhiena Žychara aŭtarstva Alesia Puškina. Prakurory ŭbačyli ŭ hetym «reabilitacyju nacyzmu». U toj ža dzień Pavieł Mažejka byŭ zatrymany na troje sutak.
Aleś Puškin viedaŭ pra kryminałku, ale nie admianiŭ vylet z Ukrainy, dzie ŭ jaho była vystava, i viečaram taho ž dnia viarnuŭsia ŭ Biełaruś.
«Z aeraporta ja vyjšaŭ prykładna ŭ 22:50. Kala druhoj nočy pazvaniła maja žonačka, što ŭ chacie śpiecnazaŭcy, pravodziać vobšuk u majsterni. Ja sieŭ na pieršuju elektryčku a 6 ranku i ŭžo a 9 byŭ u rodnym Babry (Krupski rajon). U majsterni ŭsio raźbita», — raskazvaje Puškin.
Čamu jon vyrašyŭ viartacca, chacia viedaŭ, što na jaho zaviedzienaja kryminałka? «Mnie ŭžo 55 hadoŭ, a pieršy raz ja siadzieŭ u 1988 hodzie, za zakliki da śviatkavańnia Dziadoŭ. Ja siadzieŭ u izalatary na vulicy Pryłuckaj, ciapier Akreścina. Dośvied u mianie jość. Mnie navat ministr zamiežnych spraŭ Ukrainy Dmytro Kuleba kazaŭ, kab ja zastavaŭsia i nikudy nie lacieŭ, ale ja ž nie Cichanoŭskaja, ja nie z tych, chto pry pieršaj pahrozie biažyć z krainy. Treba zmahacca tut, a nie virtualna.
Płatforma «Hołas» — heta virtualnaje zmahańnie, a ja kažu pra sapraŭdnaje, jakoje moža być tolki ŭnutry krainy. Jaki ja kryž na siabie ŭzvaliŭ — taki i mušu nieści, jak by ciažka ni było. Što mnie tut pahražaje? Nu pasadziać mianie ad 5 da 12, ale ž ja budu žyvy, nichto mianie nie zabje», — havoryć spadar Aleś.
Pra vyzvaleńnie ź izalatara Paŭła Mažejki Puškin jašče nie čuŭ: jon nie maje dostupu da internetu. Karystajecca starym knopkavym telefonam, bo ŭsio inšaje było kanfiskavana.
«Nie sprava mastaka davać niejkija acenki histaryčnym asobam, za jaho heta robiać farby i pendźli. Chaj historyki dajuć acenku Žycharu, Rodźku, Filistoviču, Hadleŭskamu i inšym supiarečlivym asobam. Ja abmiažujusia krasamoŭnym maŭčańniem tut. Puškin — heta łakmusavaja papierka dla hramadstva: ci mianie pasadziać na 11 hadoŭ, ci dazvolać dalej pracavać nad uznaŭleńniem».
Apošnim časam Puškin pracuje nad uznaŭleńniem pałaca Bułhakaŭ u Žyličach Kiraŭskaha rajona, ciapier jon znachodzicca mienavita tam.
Ciapier čytajuć
Kryk dušy Žyhara pra hrupu Kavaleŭskaha: Hučać zajavy, što Łukašenka lehitymny prezident, choć i nie abrany demakratyčna42
Kamientary