Mierkavany biełaruski špijon, zatrymany va Ukrainie, pachodziŭ z Rasii. Jon sam zdaŭsia ŭ SBU

Stali viadomyja padrabiaznaści zatrymańnia mierkavanaha biełaruskaha špijona va Ŭkrainie, pra jakoje 24 sakavika paviedamiła Słužba biaśpieki Ŭkrainy, paviedamlaje Radyjo Svaboda.

Jaho vyzvalili ad kryminalnaj adkaznaści.

Hramadzianin Biełarusi pracavaŭ namieśnikam dyrektara kampanii «MK Hrand Plus», zarehistravanaj va ŭkrainskim horadzie Dnipro. Zhodna z rejestram Ministerstva justycyi Ŭkrainy, kampaniju ačolvaje Jury Duchavienka, a zasnavalnik — Anatol Sydarapułaŭ. Proźvišča zatrymanaha namieśnika dyrektara nie ŭdałosia vyśvietlić, bo na telefanavańni pa numarach, jakija maje ŭ svaim rasparadžeńni Radyjo Svaboda, nichto nie adkazvaje — mabilny aperatar paviedamlaje, što abanent pa-za miežami dasiažnaści.

Pavodle materyjałaŭ kryminalnaj spravy, biełaruski hramadzianin u lipieni 2019 hodu pahadziŭsia na supracu z supracoŭnikam Upraŭleńnia Kamitetu dziaržaŭnaj biaśpieki Biełarusi pa Bieraściejskaj vobłaści. Zatrymany nazvaŭ śledčym proźvišča «verbavalnika», ale tyja jaho nie nazyvajuć. Pavodle zatrymanaha, jon abaviazaŭsia stvaryć «ahienturnuju sietku» dla zboru i pieradačy infarmacyi, jakaja źjaŭlajecca va Ŭkrainie dziaržaŭnaj tajamnicaj.

U studzieni 2020 hodu zatrymany sprabavaŭ, u svaju čarhu, zaverbavać supracoŭnika Łuckaha pamiežnaha atradu, jaki vałodaje infarmacyjaj, cikavaj dla biełaruskaha KDB.

Najpierš biełaruskaha «viarboŭščyka» cikaviła infarmacyja pra supracoŭnikaŭ pravaachoŭnych orhanaŭ i Dziaržaŭnaj pamiežnaj słužby Ŭkrainy, a taksama arhanizacyja hetych słužbaŭ, vykarystańnie specyjalnaj techniki dla zatrymańnia parušalnikaŭ miažy i bajavyja mahčymaści padraździaleńniaŭ. Hetuju infarmacyju supracoŭnik Łuckaha pamiežnaha atradu musiŭ pieradavać pradstaŭniku Ŭpraŭleńnia KDB Biełarusi ŭ Bieraściejskaj vobłaści ŭ časie asabistych sustreč na biełaruskaj terytoryi ŭ zahadzia ŭzhodnienych miescach.

Pavodle materyjałaŭ kryminalnaj spravy, hramadzianin Biełarusi dobraachvotna spyniŭ «niezakonnuju dziejnaść» i paviedamiŭ pra svajo verbavańnie Słužbie biaśpieki Ŭkrainy da taho momantu, jak jamu vystavili padazreńnie ŭ złačynstvie. Usie atrymanyja materyjały jon pieradaŭ supracoŭnikam SBU.

Uličvajučy ŭsie hetyja abstaviny, sud vyzvaliŭ hramadzianina Biełarusi ad kryminalnaj adkaznaści i viarnuŭ jamu mabilnyja telefony.

U sudovym rašeńni pra vyzvaleńnie biełarusa ad kryminalnaj adkaznaści ničoha nie havorycca pra toje, što ad jaho patrabavali arhanizavać kanały dla transpartavańnia zbroi i pradmietaŭ dvajnoha pryznačeńnia praź dziaržaŭnuju miažu, jak heta paviedamlała SBU.

Advakatka hramadzianina Biełarusi, abvinavačanaha ŭ špijanažy, Viktoryja Kandracišyna admoviłasia ŭdakładnić detali spravy. «Ja nia budu davać nijakaj infarmacyi. Prabačcie, heta źjaŭlajecca advakackaj tajamnicaj», — skazała jana Svabodzie.

• 0
• 0
• 0
• 0
• 0
• 0
• 0
• 0