U Biełaviežskaj puščy znajšli amierykanskaha chvojnaha kłapa
U Biełaviežskaj puščy vyjavili amierykanskaha chvojnaha kłapa — hety vid raniej nie rehistravaŭsia na terytoryi Biełarusi. Pieršyja ekzemplary pieradali ŭ navukovy adździeł parku.
Kłapy praleźli ŭnutr administracyjnaha korpusa, chutčej za ŭsio, na zimoŭku. Supracoŭnica nacyjanalnaha parku Ała Miler pryniesła nasiakomaje navukoŭcam prosta ŭ ruce. Na praciahu niekalkich dzion byli vyjaŭleny i inšyja ekzemplary. Usiaho ŭ kastryčniku 2020 hoda było znojdziena čatyry asobiny amierykanskaha chvajovaha kłapa (Leptoglossus occidentalis). Amal adnačasova, 20 kastryčnika 2020 hoda, hetyja kłapy byli zaŭvažanyja ŭ Biarozie Bresckaj vobłaści, na ścianie budynka.
U Jeŭropie amierykanski chvojny kłop upieršyniu byŭ vyjaŭleny ŭ Italii ŭ 1999 hodzie. U naš čas jon akupavaŭ užo vialikuju častku Jeŭrapiejskaha kantynienta.
U apošnija piać hadoŭ pošuk amierykanskaha chvojnaha kłapa aktyŭna pravodziŭsia i na terytoryi Biełarusi, asabliva ŭ paŭdniovaj častcy (Bresckaja i Homielskaja vobłaści), supracoŭnikami NAN Biełarusi pa bijaresursach, Biełaruskaha i Baranavickaha dziaržaŭnych univiersitetaŭ, Biełaviežskaj puščy, Bierazinskaha bijaśfiernaha zapaviednika i inš.
Pavodle daśledčykaŭ ź inšych krain, amierykanski chvojny kłop zdolny paškodzić istotnuju dolu nasieńnia chvojnych raślin (ad 70% i vyšej, u zaležnaści ad rehijona) i tym samym vyjaŭlaje važkuju pahrozu naturalnamu adnaŭleńniu chvojnych lasoŭ.
Navukoŭcy zaklikajuć da dalejšaha pošuku amierykanskaha chvojnaha kłapa, nazirańnia za dynamikaj i šlachami jaho raśsialeńnia pa terytoryi krainy, a taksama ličać nieabchodnym vyvučyć zamiežny vopyt pa abmiežavańni kolkaści vidu.
Kamientary