U płanietaryi pastaviać sučasny kupał, jaki budzie varočacca na 360 hradusaŭ.
Letaś pačaŭsia ramont viežy absiervatoryi Minskaha płanietaryja, a chutka zakryjuć na madernizacyju i budynak ustanovy. Što novaha tam źjavicca i kali skončać raboty, paviedamlajuć «Minsk-Naviny».
Letaś Minski płanietaryj adznačyŭ 60-hodździe. Jaho budynak, a taksama astranamičnuju absiervatoryju pry im pabudavali na ŭzvyššy ŭ parku imia M. Horkaha ŭ 1965 hodzie.
Štohod płanietaryj naviedvajuć bolš za 40 tysiač čałaviek, raskazaŭ zahadčyk ustanovy Alaksandr Mikulič.
Ciapier płanietaryj čakaje poŭnaje techničnaje pieraasnaščeńnie.
U kancy vosieni budaŭniki pačali ramont viežy absiervatoryi. Demantavany kupał z charakternymi mietaličnymi «łuskavinkami», adsutničajuć škleńnie i elemienty vonkavaj vintavoj leśvicy.
Da ramontu na vierchnim uzroŭni raźmiaščaŭsia teleskop. Jaho prybrali na zachavańnie, paśla budaŭničych rabot jon vierniecca na miesca. Jak rastłumačyŭ Mikulič, mianiać rarytetny aptyčny instrumient na bolš sučasny nie źbirajucca. U absiervatoryi teleskop sapraŭdy staradaŭni — firmy Carl Zeiss, z fokusnaj adlehłaściu 1 950 mm i 300‑kratnym pavieličeńniem. Vyrablali takija ŭ pačatku minułaha stahodździa.
«Heta rabočy muziejny ekspanat, jakasny i nadziejny. Takich va ŭsim śviecie zachavałasia niašmat», — zaŭvažaje zahadčyk płanietaryja.
Z dapamohaj hetaha prybora z centra horada možna nazirać samyja jarkija astranamičnyja źjavy, naprykład soniečnaje i miesiacavaje zaćmieńni, razhladać płaniety Soniečnaj sistemy, zornyja skopiščy i blizkija hałaktyki. Całkam realna ŭbačyć kolcy Saturna i pałosy na Jupitery. A Miesiac i zusim možna vyvučyć va ŭsich detalach ź jaho kratarami, harami.
Źmienicca i vieža absiervatoryi. Viaduć raboty pa ŭzmacnieńni jaje niasučych kałon, zamieniać leśvičnyja vonkavyja maršy, zmantujuć novyja vitražy.
«Ale samaje hałoŭnaje — u budynka źjavicca sučasny kupał, jaki budzie varočacca na 360 hradusaŭ, sa stvorkami. Heta davoli darahaja kanstrukcyja, abstalavanaja elektryčnym pryvadam», — tłumačyć Mikulič.
Pavarotny miechanizm kupała dazvalaje navieści teleskop i prycelicca na luby abjekt na niebie. Praŭda, zaraz jość pryrodnyja abmiežavańni: drevy ŭ parku padraśli i stali vyšej za absiervatoryju. Pytańnie ab tym, jak palepšyć bačnaść haryzontu i zrabić tak, kab nasadžeńni nie zaminali astranamičnym nazirańniam, płanujuć vyrašać sumiesna z «Minskzielanbudam», bo kožnaje dreva ŭ zialonaj zonie ŭjaŭlaje vialikuju kaštoŭnaść.
«My pastaralisia zachavać histaryčnaje abličča absiervatoryi. Paśla ramontu jana zastaniecca ź biełymi fasadami, ciomnymi akonnymi ramami», — kaža Mikulič.
Adkryć abjekt płanujuć viasnoj.
Što tyčycca budynka samoha płanietaryja, jaho taksama čakajuć maštabnyja źmieny. Ramont pačnuć u pieršym kvartale 2026 hoda. Narmatyŭnyja terminy budaŭnictva — kala šaści miesiacaŭ.
«Poŭnaściu zamienim kamunikacyi, elektryčnyja sietki. Miarkujecca pierapłaniroŭka ŭnutranych pamiaškańniaŭ u adpaviednaści z sučasnymi sanitarnymi normami. Praduhledžana surjoznaje techničnaje pieraasnaščeńnie», — dzielicca Mikulič.
Pa-pieršaje, źjavicca kampjutarny kłas dla navučalnych metaŭ: na bazie płanietaryja pracujuć hurtki pa intaresach. Pa-druhoje, płanujuć abstalavać studyju hukazapisu i videamantažu. Jana dazvolić stvarać ułasny ličbavy multymiedyjny kantent. Pa-treciaje, vialikija pieraŭtvareńni zakranuć kupalny kinateatr: u zornaj zale ŭstalujuć sučasnuju meblu i prajekcyjnaje abstalavańnie novaha ŭzroŭniu.
«Zaraz my majem prajektar firmy Carl Zeiss madeli ZKP1 pieršaha pakaleńnia. Jon dazvalaje demanstravać zornaje nieba Paŭnočnaha paŭšarja. Paśla zakupki novaha abstalavańnia źjavicca mahčymaść pakazvać u palepšanaj jakaści i Paŭnočnaje, i Paŭdniovaje paŭšarji, adlustroŭvać suzorji i ich abrysy. Palapšeńnia taksama čakaje ličbavaja sistema prajekcyi lubimych poŭnakupalnych filmaŭ», — raspaviadaje Mikulič.
Kamientary