Ci abaviazkova ciapier zaviaduć kryminałku paśla treciaha pratakoła za mitynh? Pytańni i adkazy

Ciapier na try hady ŭ kałoniju možna adpravicca za paŭtorny ŭdzieł u «niesankcyjanavanych masavych mierapryjemstvach». Na čatyry — za publičnuju demanstracyju ekstremisckaj simvoliki. Na piać — za finansavańnie ekstremisckaj dziejnaści. Spytali ŭ jurysta Paŭła Sapiełki. Jak heta budzie dziejničać na praktycy?

Pavialičyć

Kolki razoŭ možna parušyć zakon ab udziele ŭ masavych mierapryjemstvach biez pahrozy zaviadzieńnia kryminalnaj spravy?

Dva razy.

Pieršy raz pryciahnuć da adkaznaści pa častcy 1 artykuła 24.23 Administracyjnaha kodeksa. Moža być albo štraf, albo administracyjny aryšt da 15 sutak.

U druhi raz — častka 3 artykuła 24.23. Na hety raz pakarać mohuć 30 sutkami aryštu. Za treci pratakoł budzie kryminalnaja sprava.

Parušeńni pavinny być ździejśnienyja ciaham hoda ci biez terminu daŭnaści?

Dla pryciahnieńnia da kryminalnaj adkaznaści ŭ čałavieka pavinny być try niepahašanyja parušeńni — heta značyć, jany pavinny być ździejśnienyja ciaham hoda.

Kryminalnaja sprava za treciaje parušeńnie budzie zavodzicca aŭtamatyčna ci na mierkavańnie prakurora ci śledčaha?

Aŭtamatyčna. Vybar jość tolki ŭ spravach pryvatnaha ci pryvatna-publičnaha abvinavačańnia, tam vyrašaje paciarpieły. A tut sprava publičnaha abvinavačańnia. Kali orhan kryminalnaha pieraśledu bačyć skład złačynstva, to jon zavodzić kryminalnuju spravu. U zakonie, kaniečnie, nie napisana, što prakuror ci śledčy pavinien dobra padumać, i kali jamu chočacca, to zavieści spravu, a kali nie — to nie. Jany pavinny zavodzić na padstavie parušeńniaŭ.

Buduć adličvacca pravaparušeńni ad momantu ŭstupleńnia papravak u siłu ci ŭsie pratakoły ciaham apošniaha hoda?

Dla mianie samoha heta vialikaja zahadka. Na dobry tołk usio pavinny pačać z nula i ličyć administracyjnyja pakarańni z momantu ŭviadzieńnia ŭ siłu hetaj normy. Ale ja bajusia, što buduć ličyć i tyja administratyŭki, jakija majucca na siońnia. Chacia isnuje praviła, što nie moža mieć zvarotnuju siłu kryminalny zakon, jaki paharšaje stanovišča. Dumaju, usio chutka zapracuje i my ŭbačym, jak heta budzie na praktycy.

Heta značyć, što ciapier u kałoniju možna trapić, kali trojčy nie źniaŭ bieł-čyrvona-biełyja śniažynki z akna?

Situacyja dramatyčnaja, my ž bačym, jak prymianiajecca pakarańnie pa hetym artykule. Va ŭsich jość razumieńnie, što jano niespraviadlivaje, ale ŭsio ž maksimum — 15-30 sutak. Ciapier ža my bačym, što moža stać našmat horš. Na padstavie lipavych administracyjnych pratakołaŭ ludziej mohuć adpraŭlać u kałoniju.

Ź inšaha boku, tut možna ŭhledzić i plus. Ciapier mnohija ludzi ličać za lepšaje nie abskardžvać administracyjnyja pratakoły. Ciapier ža sud, prymajučy rašeńnie ab trecim pravaparušeńni, pavinien pravieryć zakonnaść nakładańnia papiarednich spahnańniaŭ. Kali sud vynosić rašeńnie, skažam, ab zakonnaści zvalnieńnia ŭ suviazi sa šmatlikimi parušeńniami dyscypliny, to sudździa pavinien pravieryć, ci zakonna nakładalisia hetyja spahnańni za kožnaje z parušeńniaŭ.

Kali praktyka pojdzie pa hetym šlachu, to budzie adno z dvuch: ci nie nadta aktyŭna budzie prymianiacca hety artykuł, ci źmienicca praces nakładańnia administracyjnych spahnańniaŭ. Ja maju na ŭvazie bolšuju farmalizacyju i bolšuju adkaznaść za składańnie pratakołaŭ.

Parušeńnie nie stanovicca bolš ciažkim ad adnaho vypadku da druhoha i treciaha. To čamu spačatku administratyŭka, a potym kryminałka?

Hetaja daŭniaja navukovaja dyskusija. U abodvuch punktaŭ hledzišča jość svaje prychilniki. Jość viadomy vyraz, što sa sta kotak nielha sabrać tyhra. Jość mierkavańnie, što parušajecca pryncyp dvajnoha pakarańnia za adno i toje ž pravaparušeńnie.

Ale ź inšaha boku, isnujuć mierkavańni, što samo parušeńnie ciažkaść nie źmianiła, ale kali jano ździejśniena adnym i tym ža čałaviekam, tym samym nabyvaje hramadskuju niebiaśpieku. U nas isnuje, naprykład, artykuł 317 KK «Kiravańnie transpartnym srodkam u stanie ałkaholnaha apjanieńnia». Pieršy pratakoł — heta administratyŭnaje parušeńnie, a druhoje — kryminalnaje.

• 0
• 0
• 0
• 0
• 0
• 0
• 0
• 0