«Na toje miełasia vialikaje žadańnie kiraŭnictva». Zorcy Opiernaha daviałosia syści z teatra
Salistka Nacyjanalnaha teatra opiery i baleta Natalla Akinina zvolniłasia z teatra. Infarmacyju pra heta jana paćvierdziła «Našaj Nivie».
«Ad siońnia ja nie zahadčyca trupy opiery i nie salistka Vialikaha teatra Biełarusi. Ja nie zvolnienaja, jak Silčukoŭ, Hałanaŭ i muzykanty našaha arkiestra. Syšła pa zhodzie bakoŭ».
Pry hetym, jak padkreślivaje Akinina, na toje było vialikaje žadańnie kiraŭnictva teatra.
Natalla Akinina — viadomaja opiernaja śpiavačka. Skončyła Minskaje muzyčnaje vučylišča i Akademiju muzyki. Pracavała salistkaj muzyčnaj kapeły «Sanorus», z 2005 hoda — u Opiernym.
Jak patłumačyli krynicy «Našaj Nivy», raniej u Akininaj byŭ doŭhaterminovy kantrakt śpiavački, raźličany na niekalki hadoŭ napierad. Hod tamu jaje paprasili stać zahadčycaj opiernaj trupy. Jana zhadziłasia, pracavała tam na staŭku, adnačasova salistkaj — na pałovu staŭki.
Niadaŭna Akininaj nie padoŭžyli kantrakt jak zahadčycy trupy. A jak salistcy zamiest doŭhaterminovaha kantrakta joj prapanavali biesterminovuju damovu na pałovu staŭki. Heta daje mahčymaść praściej zvolnić jaje. Akinina admovilisia i syšła.
Śpiavačka paćvierdziła hetuju infarmacyju NN.
«Zastavacca ŭ ciapierašnich umovach navat dziela muzyki i śpievaŭ ja paličyła niemahčymym dla siabie. Dakazvać hetym ludziam svaju prafiesijnaść jak čałavieka i śpiavački dla mianie nieprymalna».
U pres-słužbie Opiernaha teatra admovilisia ad kamientaroŭ.
Heta nie pieršy sychod zorak Opiernaha za apošni čas. Vosieńniu 2020 hoda z teatra byli zvolnienyja dyryžory Andrej Hałanaŭ, śpiavak Ilja Silčukoŭ, kancertmajstar Rehina Sarkisava, skrypačka Ała Džyhan i altystka Alaksandra Paciomina. Heta adbyłosia paśla akcyi «Volnaha choru», što adbyłasia pierad pačatkam adnaho sa śpiektaklaŭ.
Paśla skančeńnia hetaha siezona ŭ teatry nie zastaniecca narodny artyst Biełarusi Uładzimir Piatroŭ, jaki — hetaksama jak Silčukoŭ — udzielničaŭ u zapisie zvarotaŭ suprać hvałtu.
Teatr zvolniŭ hałoŭnaha dyryžora Viačasłava Voliča i nie praciahnuŭ kantrakt śpiavačcy Kaciarynie Hałaŭlovaj.
U kułuarach kažuć pra paśladoŭnaje zvalnieńnie salistaŭ dy supracoŭnikaŭ Opiernaha, jakija vykazvali svaju pazicyju.
Sychody Piatrova i Akininaj adbylisia paśla taho, jak u mai 2021-ha dyrektaram teatra staŭ Viačasłaŭ Harbuzaŭ. Raniej jon byŭ dyrektaram Bresckaha teatra dramy, pačynaŭ karjeru ŭ BRSM.
Čytajcie taksama:
Paśla akcyi salidarnaści z Opiernaha zvolnili dyryžora, pieršuju skrypku arkiestra, skrypačku i altystku
«Sumleńnie daražejšaje» — Illa Silčukoŭ pra zvalnieńnie ź Vialikaha teatra za «amaralny ŭčynak»
Ciapier čytajuć
Jak u halečy śpivałasia radnia Łukašenki? Małaviadomyja fakty30
Kamientary