U izalatary časovaha ŭtrymańnia na Akreścina pryniali pieradačy dla hałoŭnaha redaktara — dyrektara BiełaPAN Iryny Leŭšynaj, buchhałtara Kaciaryny Bajavoj i byłoha dyrektara kampanii Dźmitryja Navažyłava, paviedamlajuć naviny.online.
Usie troje byli zatrymanyja 18 žniŭnia paśla pieratrusaŭ doma i ŭ ofisie kampanii. Taksama ŭ hety dzień pieratrusy prajšli doma ŭ namieśnika hałoŭnaha redaktara Alaksandra Zajcava, žurnalistaŭ Iryny Turčynoj i Zachara Ščarbakova.
Ščarbakoŭ i Turčyna byli dapytanyja va USK pa Minsku, paśla čaho adpuščanyja pad padpisku ab nierazhałošvańni. Zajcaŭ na dopyt nie dastaŭlaŭsia, ale padpisaŭ abaviazacielstva ab jaŭcy.
U pastanovach na pieratrus było paznačana, što jany pravodziacca ŭ ramkach zaviedzienych kryminalnych spraŭ ab masavych biesparadkach i hrupavych dziejańniach, jakija hruba parušajuć hramadski paradak. Pa ŭsioj bačnaści, havorka idzie pra artykuły 293 i 342 Kryminalnaha kodeksa.
Siervier, na jakim raźmiaščaŭsia sajt kampanii, kanfiskavany. Sajt niedastupny. Taksama kanfiskavany redakcyjny siervier.
Kamientary