5 krain, što padčas pandemii viartajucca da zvyčajnaha žyćcia i spraŭlajucca lepiej za Biełaruś

CNN prapanuje śpis z 5 krain, jakija ŭžo stali na taki šlach.

Danija: 370 novych vypadkaŭ (pa stanie na 15 vieraśnia — prym.)

10 vieraśnia dacki ŭrad źniaŭ usie kavidnyja abmiežavańni, jakija jašče dziejničali ŭ krainie. Čynoŭniki abviaścili, što kavid bolš nie źjaŭlajecca chvarobaj, jakaja niasie dla hramadstva krytyčnuju pahrozu. Ciapier datčanie mohuć naviedvać načnyja kłuby i restarany biez kavidnych pašpartoŭ, nie nasić masku ŭ hramadskim transparcie, taksama źniatyja lubyja abmiežavańni pa kolkaści ludziej, jakija mohuć razam sustrakacca.

Častkova taki pośpiech źviazany z tempami vakcynacyi. Pa danych na 13 vieraśnia, bolš za 74% datčan atrymali poŭnuju dozu supraćkavidnaj pryščepki. Tym nie mienš, čynoŭniki krainy ŭpeŭnivajuć, što, kali tempy zachvorvańniaŭ pačnuć pavialičvacca, miery pieraściarohi znoŭ buduć pryniatyja.

Sinhapur: 807 novych vypadkaŭ

U červieni sinhapurski ŭrad abviaściŭ, što ciapier kraina pierachodzić na stratehiju «žyćcio pry kavidzie». Zamiest taho, kab nakładvać na ludziej niejkija abmiežavańni, ułady vyrašyli kantralavać kolkaść zachvorvańniaŭ z dapamohaj vakcyn i sačyć za ŭzroŭniem špitalizacyj.

U žniŭni ŭłady pačali zdymać niekatoryja miery pieraściarohi. Naprykład, całkam vakcynavanyja ludzi atrymali prava naviedvać restarany i źbiracca ŭ hrupach da piaci čałaviek (raniejšy maksimum składaŭ dva čałavieki).

Adnak prychod u krainu štama «delta», jaki vielmi lohka pieradajecca, vyklikaŭ usplesk kolkaści chvorych i adpaviedna pastaviŭ spadziavańni sinhapurcaŭ pad pahrozu. Ciapier čynoŭniki papiaredžvajuć, što, mahčyma, abmiežavańni pryjdziecca viarnuć. Pakul što ŭłady sprabujuć strymać virus praz adsočvańnie kantaktaŭ i mahčymych krynic zaražeńnia, a taksama bolš častaje abaviazkovaje teściravańnie dia supracoŭnikaŭ śfier vysokaj ryzyki. Pra vakcynacyju ŭ Sinhapury taksama nie zabyvajuć — tut jaje ŭzrovień składaje 81%.

Taiłand: 13 801 novy vypadak

U nastupnym miesiacy Taiłand płanuje adkryć dla zamiežnych turystaŭ Banhkok i inšyja papularnyja łakacyi. Dla krainy heta jašče adzin krok na šlachu vyratavańnia žyćciova važnaj turystyčnaj industryi va ŭmovach rostu kolkaści chvorych. Ciapier całkam vakcynavanyja turysty zdolejuć naviedać stalicu Taiłanda, a taksama harady Chuachin, Pataja i Čyjanhmaj. Inšaja papularnaja łakacyja, vostraŭ Pchukiet, staŭ dastupny dla zamiežnikaŭ jašče 1 lipienia.

U 2020 hodzie strohi karancin dapamoh tajcam paźbiehnuć vialikaj kolkaści chvorych, adnak u hetym hodzie kraina adčuła na siabie ŭdar pandemii. Što datyčycca vakcynacyi, tut Taiłand jaŭna nie ŭ lidarach — usiaho 18% całkam pryščeplenych.

Paŭdniovaafrykanskaja Respublika: 4667 novych vypadkaŭ

Paśla taho jak u PAR kolkaść zaražeńniaŭ pačała źnižacca, urad krainy źniaŭ niekatoryja kavidnyja abmiežavańni. Siarod inšaha, ułady skaracili kamiendancki čas — ciapier jon doŭžycca z 11-j hadziny viečara da 4-j ranicy, źniali častku abmiežavańniaŭ na prodaž ałkaholu, a taksama pavysili limity pa kolkaści ludziej, jakija mohuć źbiracca razam. Ciapier dla pamiaškańniaŭ hetyja limity składajuć 250 čałaviek, a dla adkrytych placovak — 500 čałaviek.

PAR prajšła amal usiu pandemiju z vyklučna strohimi mierami supraćkavidnaj pieraściarohi — časam u krainie ŭvohule dazvalali ludziam źbiracca razam tolki na pachavańniach. Pakul što ŭ PAR nie nadta vysoki ŭzrovień vakcynacyi, tolki bolš za čverć darosłych atrymali chacia b adnu dozu pryščepki. Adnak čynoŭniki śćviardžajuć, što ŭ ich chopić vakcyn na ŭsio nasielnictva krainy.

Čyli: 401 novy vypadak

Zhodna z aficyjnymi danymi, prykładna 87% čylijcaŭ, što padpadajuć pad vakcynacyju, užo atrymali poŭnuju dozu pryščepki. Miedyki ŭžo navat pačali davać takim ludziam dadatkovyja dozy vakcyny.

Niahledziačy na pahrozu, što sychodzić ad štama «delta», čylijski ŭrad źbirajecca z 1 kastryčnika adkryć krainu dla mižnarodnaha turyzmu. Ad zamiežnikaŭ budzie patrebna tolki adpaviadać šerahu patrabavańniaŭ i syści na piacidzionnuju samaizalacyju pa pryjeździe ŭ krainu.

***

Biełaruskaje kiraŭnictva adrazu abrała taki styl žyćcia, nibyta kavidu nie isnuje. Biełarusy i sami admaŭlajucca ad mier pieraściarohi, nie śpiašajucca prachodzić vakcynacyju. Ale danyja niesuciašalnyja. Navat aficyjnyja krynicy pryznajuć, što ŭ krainu pryjšła čaćviortaja chvala pandemii kavidu, i pa stanie na 16 vieraśnia za apošnija sutki było zarehistravana 1967 novych vypadkaŭ chvaroby. Što da nieaficyjnaj infarmacyi, to prychodziać źviestki pra čerhi ŭ paliklinikach i pierapoŭnienyja adździaleńni kavidnych špitaloŭ.

• 0
• 0
• 0
• 0
• 0
• 0
• 0
• 0