U Biełarusi źnik z prodažu krytyčna važny lekavy srodak dla ludziej ź bipalarnym razładam
Ludzi z receptam prychodziać pa preparat — i sychodziać z pustymi rukami.
U pačatku śniežnia ź biełaruskich aptek źnik lityj. Nie «staŭ radziej sustrakacca», nie «pradajecca pa tałonach», a prosta źnik. Pry hetym preparat farmalna zarehistravany, licenzija dziejničaje, lekary mohuć praciahvać jaho pryznačać, pišuć «Biełyja chałaty».
Pavodle słoŭ śpiecyjalistaŭ, u stacyjanarach, mahčyma, jašče zastalisia niejkija zapasy, ale ambułatornyja pacyjenty (tyja, chto paśla vizitu da lekara pavinien samastojna kupić leki ŭ aptecy) zrabić hetaha nie mohuć.
Nijakich aficyjnych paviedamleńniaŭ ad Ministerstva achovy zdaroŭja abo «Biełfarmacyi» nie było. Infarmacyja pryjšła pa niefarmalnych kanałach.
Vyśvietliłasia, dakumienty na pastaŭku byli aformleny «niejak nie tak». Praz heta čarhovaja partyja preparata, vyrablenaha ŭ Rasii, nie pastupiła ŭ apteki. Kali jana źjavicca — nieviadoma.
U Biełarusi lityj pradajecca ŭ tabletkach u formie karbanatu pad handlovaj nazvaj «Siedalit». Nijakich alternatyŭnych formaŭ abo inšych pastaŭščykoŭ, faktyčna, niama. Mienavita «Siedalit» staŭ niedastupnym. Da 2022 hoda ŭ krainie byŭ jašče lityj ajčynnaj vytvorčaści pad nazvaj «Litaceł», ale z taho času rehistracyja nie abnaŭlałasia i vytvorca jaho bolš nie vypuskaje.
Lityj byŭ i zastajecca preparatam pieršaj linii dla lačeńnia bipalarnaha razładu. Jon staić na pieršym miescy ŭ biełaruskim kliničnym pratakole ŭ raździełach lačeńnia manijakalnaha epizodu i prafiłaktyki BAR. Lityj uvachodzić u pieršuju liniju i ŭ mižnarodnych rekamiendacyjach na ŭsich etapach razładu.
Pavodle źviestak SAZ, ź bipalarnym razładam žyvuć kala 0,5% nasielnictva. U Biełarusi heta prykładna 45 tysiač čałaviek. Viadoma, lityj pryznačajuć nie ŭsim. Ale dla mnohich pacyjentaŭ mienavita lityj źjaŭlajecca klučavym elemientam terapii.
U ludziej z BAR ryzyka suicydu ŭ 10—20 razoŭ vyšejšaja, čym u ahulnaj papulacyi, i mienavita stabilny pryjom lityju dazvalaje źnizić hetyja ryzyki. A voś rezkaje spynieńnie pryjomu imaviernaść suicydu pavialičvaje.
Ciapier čytajuć
Kvadrat u Minsku kaštuje rekordna doraha: narešcie pabity rekord 2007 hoda2
Kamientary