Novapałačaninu Jaŭhienu Charaškieviču prysudzili čatyry hady kałonii. Na abviaščeńnie prysudu prynieśli fota trochmiesiačnaj dački
Prysud vynies 16 vieraśnia Viciebski abłasny sud. 27-hadovaha Jaŭhiena abvinavačvali adrazu pa troch artykułach, u tym liku ŭ padrychtoŭcy dziejańniaŭ, jakija hruba parušajuć hramadski paradak.
Rašeńnie ahučyŭ sudździa Andrej Prejs. Bok abvinavačańnia pradstaŭlaŭ prakuror Alaksandr Filimonaŭ. Sud nad Charaškievičam prachodziŭ u zakrytym režymie, paviedamlajuć pravaabaroncy.
Jaŭhiena Charaškieviča pryznali vinavatym u naŭmysnych dziejańniach, nakiravanych na raspalvańnie sacyjalnaj varožaści pa prykmietach sacyjalnaj prynaležnaści (č. 1 art. 130 KK), u publičnaj abrazie pradstaŭnika ŭłady ŭ suviazi z vykanańniem im słužbovych abaviazkaŭ (art. 369 KK), a taksama «ŭ padrychtoŭcy i arhanizacyi hrupavych dziejańniaŭ, jakija hruba parušajuć hramadski paradak» (č. 1 art. 342 KK).
Pa sukupnaści pakarańniaŭ Jaŭhiena Charaškieviča asudzili na 4 hady pazbaŭleńnia voli z adbyvańniem pakarańnia ŭ kałonii ahulnaha režymu.
Zhodna z prysudam, jon musić vypłacić supracoŭnikam MUS, jakija byli pryznanyja paciarpiełymi, kampiensacyju maralnaj škody: starejšamu opierupaŭnavažanamu hrupy pa raskryćci złačynstvaŭ u śfiery vysokich technałohij Navapołackaha HAUS Dzianisu Śviackamu — 1500 rubloŭ i vykładčycy kafiedry prafiesijna-prykładnoj fizkultury akademii MUS Natalli Pietuchovaj — 1000 rubloŭ.
Jaŭhien Charaškievič byŭ zatrymany 19 studzienia 2021 hoda ŭ Navapołacku.
Jak raskazaŭ baćka abvinavačanaha Alaksandr, prablemy pačalisia paśla taho, jak syn pajšoŭ naziralnikam na vybarčy ŭčastak pa miescy prapiski ŭ vioscy Farynava. Napisaŭ skarhu ŭ prakuraturu z nahody hrubaha parušeńnia Vybarčaha kodeksa, u jakoj infarmavaŭ pra nieapiačatanuju urnu dla hałasavańnia. Paśla hetaha, 12 žniŭnia, da Jaŭhiena na pracu pryjechali supracoŭniki milicyi i zatrymali jaho. Ale nieŭzabavie adpuścili. 19 studzienia 2021 jon znoŭ byŭ zatrymany, ale ŭžo ŭ miežach kryminalnaj spravy.
Za hety čas baćka bačyŭ syna tolki adnojčy.
Na abviaščeńnie prysudu baćki Jaŭhiena prynieśli ŭ zału razdrukavanyja kalarovyja fotazdymki jaho trochmiesiačnaj dački Miłany. Pakul jon byŭ za kratami, u jaho naradziłasia dzicia, jakoha jon jašče nie bačyŭ.
Ciapier čytajuć
Ajcišnika z «Varhiejminha» sudzili pa rasstrelnym artykule. Padobna, za padtrymku Ukrainy — praŭda, zrabić jon ničoha nie paśpieŭ5
Kamientary