Košcy, jakaja straciła łapku, upieršyniu pastavili pratez biełaruskaj vytvorčaści
Unikalnuju apieracyju praviali vieterynary ŭ Hrodnie.
U adnoj z haradskich klinik vieterynar ź Lidy Pavieł Žulpa praapieryravaŭ košku z Baranavič, pryviezienuju vałanciorami. Žyvioła raniej straciła zadniuju łapku. Ciapier u koški znoŭ źjavicca mahčymaść paŭnavartasna pierasoŭvacca, paviedamlaje BiełTA.
Dośvied pratezavańnia ŭ vieterynaraŭ ź Lidy ŭžo byŭ, ale raniej dla hetaha vykarystoŭvali rasijskija vyraby. U hety raz tytanavyja pratezy na 3D-pryntary addrukavała adna ź minskich kampanij.
«Heta vielmi składany, karpatlivy praces. Raniej zakazvali pratezy ŭ Novasibirsku. Davodziłasia čakać ich pa 3-4 miesiacy. Ciapier ža možam paskoryć hetuju praceduru, dy i praściej, kali jość mahčymaść kantralavać vyrab», — raspavioŭ Pavieł Žulpa.
Pratezy pakrytyja śpiecyjalnym składam, kab lepš pryžyvalisia da kostak koški.
Paśla apieracyi pacyjentka pačuvajecca dobra. Hałoŭny pakazčyk, z uśmieškaj adznačaje vieterynar, dobry apietyt. Zvyčajna asablivaj fizičnaj reabilitacyi nie patrabujecca, košcy treba prosta pryvyknuć, što ŭ jaje znoŭ jość łapka.
Udzielničali va ŭnikalnaj apieracyi studenty i vykładčyki Hrodzienskaha dziaržaŭnaha ahrarnaha ŭniviersiteta. U pierśpiektyvie va ŭniviersitecie płanujecca arhanizavać sučasnuju vietkliniku, dzie buduć pravodzić i takija apieracyi z prymianieńniem vysokich technałohij. Płanujecca vieści prafaryjentacyju: bližej znajomić školnikaŭ z prafiesijaj vieterynara.
U najbližejšy čas zapłanavany jašče niekalki apieracyj pa pratezavańni kaniečnaściaŭ u žyvioł. U liście čakańnia kot i sabaka, što trapiŭ pad ciahnik.
Ciapier čytajuć
«Dla biełaruskich uładaŭ ja, chutčej, mahčymaść, a nie pahroza». Kaleśnikava dała vialikaje intervju Zołatavaj80
Kamientary