«Ja nievinavataja»: Maryja Kaleśnikava admoviłasia prasić ab pamiłavańni
Maryja Kaleśnikava, jakuju sud prysudziŭ da 11 hadoŭ pazbaŭleńnia voli, nie stanie prasić ab pamiłavańni. U razmovie z RBK jana nazvała prysud «achiniejaj», a 41 tom spravy — «zboram makułatury».
«Ja nie vinavataja i ni ab jakim prašeńni ab pamiłavańni nie moža być i havorki», — zajaviła Kaleśnikava.
Pa słovach Kaleśnikavaj, joj nieadnarazova prapanoŭvali pajści na ździełku, u tym liku dać intervju dziaržaŭnamu telekanału, kab skaracić termin abo ŭ zamien na svabodu, ale jana kožny raz admaŭlałasia.
«Prapanovy siamji pakinuć Biełaruś, napisać prašeńnie ab pamiłavańni, listy, źniacca ŭ kino i być na voli — heta śviedčańni taho, što ŭłada nie razumieje, što prablema nie ŭva mnie i ŭ Maksimu [Znaku], prablema ŭ tym, što ŭłada straciła lehitymnaść, davier u vačach biełarusaŭ», — kaža jana.
Kaleśnikava ŭpeŭniena, što heta «nie vyrašyć ni represijami, ni filmami» i što im viery niama i być nie moža, raz navat u takoj situacyi «jany niazdolnyja da sumlennaj hulni».
6 vieraśnia Minski abłasny sud prysudziŭ Maryju Kaleśnikavu i Maksima Znaka da 11 hadoŭ kałonii ahulnaha režymu i 10 hadoŭ kałonii strohaha režymu adpaviedna.
Ich pryznali vinavatymi ŭ ździajśnieńni złačynstvaŭ, praduhledžanych č. 1 art. (zmova z metaj zachopu ŭłady), č. 3 art. 361 (zakliki da dziejańniaŭ, nakiravanyja na pryčynieńnie škody nacyjanalnaj biaśpiecy), č. 1 art. 361-1 (stvareńnie ekstremisckaha farmiravańnia) Kryminalnaha kodeksa Biełarusi.
Kamientary