«Я невінаватая»: Марыя Калеснікава адмовілася прасіць аб памілаванні
Марыя Калеснікава, якую суд прысудзіў да 11 гадоў пазбаўлення волі, не стане прасіць аб памілаванні. У размове з РБК яна назвала прысуд «ахінеяй», а 41 том справы — «зборам макулатуры».
«Я не вінаватая і ні аб якім прашэнні аб памілаванні не можа быць і гаворкі», — заявіла Калеснікава.
Па словах Калеснікавай, ёй неаднаразова прапаноўвалі пайсці на здзелку, у тым ліку даць інтэрв'ю дзяржаўнаму тэлеканалу, каб скараціць тэрмін або ў замен на свабоду, але яна кожны раз адмаўлялася.
«Прапановы сям'і пакінуць Беларусь, напісаць прашэнне аб памілаванні, лісты, зняцца ў кіно і быць на волі — гэта сведчанні таго, што ўлада не разумее, што праблема не ўва мне і ў Максіму [Знаку], праблема ў тым, што ўлада страціла легітымнасць, давер у вачах беларусаў», — кажа яна.
Калеснікава ўпэўнена, што гэта «не вырашыць ні рэпрэсіямі, ні фільмамі» і што ім веры няма і быць не можа, раз нават у такой сітуацыі «яны няздольныя да сумленнай гульні».
6 верасня Мінскі абласны суд прысудзіў Марыю Калеснікаву і Максіма Знака да 11 гадоў калоніі агульнага рэжыму і 10 гадоў калоніі строгага рэжыму адпаведна.
Іх прызналі вінаватымі ў здзяйсненні злачынстваў, прадугледжаных ч. 1 арт. (змова з мэтай захопу ўлады), ч. 3 арт. 361 (заклікі да дзеянняў, накіраваныя на прычыненне шкоды нацыянальнай бяспецы), ч. 1 арт. 361-1 (стварэнне экстрэмісцкага фарміравання) Крымінальнага кодэкса Беларусі.
Марыя Калеснікава расказала пра сваё жыццё ў СІЗА: «Турма — гэта агіднае месца, але тут я пачуваюся свабоднай»
Цяпер чытаюць
«Засяроджуся на працы з ЗША». Ціханоўскі расказаў пра свае палітычныя планы на 2026 год22
Каментары