Historyja zvyčajnaha cudu. Jak Japonija dabiłasia pośpiechu ŭ baraćbie z kavidam
Prostyja mietady baraćby pryviali da ŭražalnych vynikaŭ.
Kali ŭ žniŭni zakančvałasia Takijskaja alimpijada, epidemija kavidu ŭ Japonii dasiahała katastrafičnaha razmachu. Tolki 13 žniŭnia ŭ stalicy krainy zarehistravali rekordnyja 5773 novyja vypadki chvaroby, pa ŭsioj krainie ŭ toj dzień zafiksavali bolš za 25 tysiač novych zaražeńniaŭ. Sumnaj statystykaj japoncy šmat u čym byli abaviazanyja štamu «delta», jaki pieradajecca našmat lahčej za inšyja varyjanty kavidu.
Špitali krainy pracavali va ŭmovach biesprecedentnaj nahruzki, piša Guardian.
Tysiačy japoncaŭ z stanoŭčym testam na kavid nie mahli być špitalizavanyja praź niedachop miescaŭ i byli vymušanyja zastavacca doma, a ŭ niekatorych vypadkach i pamirać doma.
Premjer krainy Josichide Suha byŭ vymušany na fonie stała nizkich rejtynhaŭ syści ŭ adstaŭku.
Raniej, kab tolki pravieści Takijskuju alimpijadu, jon ihnaravaŭ zaŭvahi svajho hałoŭnaha daradcy pa achovie zdaroŭja nakont situacyi z kavidam.
Ale ŭ nastupnyja dva miesiacy paśla zakryćcia Hulniaŭ zdaryłasia niešta niezvyčajnaje.
Dva tydni tamu ŭ Japonii kančatkova admianili aficyjnyja miery pieraściarohi suprać kavidu.
Zaraz u Japonii kolkaść zaražeńniaŭ dasiahnuła samaha nizkaha ŭzroŭniu bolš čym za hod, i heta daje padstavy spadziavacca, što drenny pieryjad dla japonskaj ekanomiki ŭžo skončany.
11 kastryčnika ŭ Tokia zafiksavali 49 novych vypadkaŭ kavidu — samaja nizkaja ličba z červienia minułaha hoda. Pa ŭsioj krainie, u svaju čarhu, 11 kastryčnika zarehistravali 369 novych vypadkaŭ chvaroby.
U čym sakret japoncaŭ?
Ekśpierty ličać, što za pośpiecham japoncaŭ u baraćbie z kavidam stajać niekalki faktaraŭ, i adzin ź ich — vakcynacyja.
U pačatku jana prachodziła na terytoryi Japonii nie nadta aktyŭna, ale paźniej pieratvaryłasia ŭ kampaniju sapraŭdy ŭražalnych maštabaŭ. Pry hetym kampanija pa vakcynacyi ŭ Japonii amal nie supravadžałasia supracivam z boku miascovaha nasielnictva, niahledziačy na toje, što ŭ japoncaŭ zaŭsiody było składanaje staŭleńnie da pryščepak.
Zaraz amal 70% z 126 miljonaŭ japoncaŭ prajšli vakcynacyju suprać kavidu.
Urad krainy abiacaje, što da listapada vakcynu atrymajuć usie, chto hetaha žadaje. Novy premjer krainy Fumio Kisida śćviardžaje, što ŭžo ŭ śniežni niekatoryja japoncy zdolejuć atrymać bustarnuju dozu vakcyny. Spačatku prava na jaje buduć mieć miedyki i pažyłyja ludzi.
Jašče adna pryčyna japonskaha pośpiechu — šyroka raspaŭsiudžanaje našeńnie masak, u tym liku ŭ pamiaškańniach. Hetaja zvyčka źjaviłasia ŭ japoncaŭ užo daŭno, jašče padčas siezonnych epidemij hrypu ŭ dakavidnuju epochu.
Zaraz inšyja krainy, dzie taksama źnižajecca kolkaść chvorych, admaŭlajucca ad abaviazkovaha našeńnia masak u pamiaškańniach, ale heta nie pra japoncaŭ. Bolšaść ź ich usio roŭna nosiać maski.
Niahledziačy na aptymistyčnyja ličby, ekśpierty papiaredžvajuć, što nie varta ličyć, nibyta niebiaśpieka całkam źnikła. Pa ich mierkavańni, kolkaść chvorych u krainie moža pačać znoŭ raści z nabližeńniem zimy i ŭstalavańniem bolš chałodnaha nadvorja. U kancy hoda ŭ Japonii prachodzić siezon viečarynak bonenkaj, padčas jakoha ludzi buduć masava źbiracca ŭ barach i restaranach, dzie zvyčajna drennaja vientylacyja. Heta taksama budzie spryjać rostu vypadkaŭ kavidu.
Kamientary