«My ciabie rychtavali — adpracuj 10 hadoŭ». Łukašenka patrabuje vyrašyć prablemu adtoku miedykaŭ za miažu
Alaksandr Łukašenka siońnia naviedaŭ u Oršy haradskuju balnicu №1 imia Siamaški. Padčas naviedvańnia jon vykazaŭsia nakont prablemy niedachopu miedycynskich rabotnikaŭ i ich adtoku za miažu. Pa jaho słovach, bolš za ŭsio ŭ Biełarusi nie chapaje anesteziołahaŭ-reanimatołahaŭ.
«Ty za biaspłatna padrychtavaŭ aniestezijołahaŭ-reanimatołahaŭ, — źviarnuŭsia Łukašenka da ministra achovy zdaroŭja Dźmitryja Pinieviča. — I navat kali nie za biudžet, a płatna-kapiejki płaciać. U nas naohuł biaspłatnaje adukacyju, a tam, dzie płaciać, heta ŭ 10 razoŭ mienš, čym u Amierycy ci Hiermanii».
«My jaho biaspłatna padrychtavali, jon machnuŭ nam rukoj i pajechaŭ zarablać. Tut jość prablema, i ty mnie pavinien unieści ŭ novym hodzie prapanovu, až da drakonaŭskich mietadaŭ, — daŭ Łukašenka zadańnie ministru. — Pryjšoŭ va ŭniviersitet vučycca — pryjšoŭ, skončyŭ. My ciabie rychtavali, da prykładu, adpracuj 10 hadoŭ.
Potym chočaš kudyści źjechać — apłaci nam košt taho, što my ciabie vučyli, i jedź. Abo chaj tyja zapłaciać, kudy ty pajedzieš. Tady źjechaŭ i źjechaŭ-pryjšli maładyja, novyja. Nam treba pastavić usie kropki nad «i». U novym hodzie ty pavinien unieści prapanovy».
Dadatkova Łukašenka paabiacaŭ dla miedykaŭ siarednija zarobki ŭ 2 tysiačy rubloŭ.
«Dźvie tysiačy mienš nielha. Uzrovień hetych zarobkaŭ dla daktaroŭ treba zachavać. Jany pojduć u nas u biudžetnaj śfiery jak łakamatyŭ pa zarpłacie, budziem i nastaŭnikaŭ padciahvać. Nie moža być krainy biez doktara i nastaŭnika. Heta naša sapraŭdnaja intelihiencyja», — skazaŭ jon.
Pry hetym, u 2020-m hodzie siaredni naličany zarobak miedykaŭ u Biełarusi skłaŭ 1144,1 rubli, u daktaroŭ — 1881. Praŭda, jak praviła, heta praca nie na adnu staŭku.
Nahadajem, ciapier paśla skančeńnia miedycynskaha ŭniviersiteta miedyki pavinny adpracavać, jak i ŭsie maładyja śpiecyjalisty, — 2 hady.
Usiaho ž u Biełarusi, pa dadzienych ahulnarespublikanskaha banka vakansij, nie chapaje kala 10 tysiač miedrabotnikaŭ.
Ciapier čytajuć
Chto taja Alina, ź jakoj Łukašenka tancavaŭ hetym razam na navahodnim bali18
Kamientary