Urad Hiermanii: Minsk nie adkazvaŭ na sproby Bierlina vyjści na pramy kantakt.
Aficyjny pradstaŭnik urada Hiermanii Štefen Zajbiert u sieradu patłumačyŭ, čamu v. a. kanclera Anhieła Mierkiel pra situacyju na biełaruska-polskaj miažy havaryła z Uładzimiram Pucinym cieraz hałavu Minska.
«Acenka niamieckaha boku zaklučajecca ŭ tym, što rasijskaje kiraŭnictva maje značny ŭpłyŭ u Minsku i na režym Łukašenki. Mierkiel praviała telefonnuju razmovu z rasijskim prezidentam.
Toje, što jana skazała pra instrumientalizacyju ludziej, mihrantaŭ, — jana skazała b heta naŭprost, zrazumieła, lubomu pradstaŭniku Biełarusi», — zajaviŭ Zajbiert na bryfinhu ŭ sieradu, adkazvajučy na pytańnie, čamu Mierkiel nie pasprabavała pahavaryć naŭprost z Łukašenkam.
Jon nahadaŭ, što «kancler z pačatku biełaruskaha kanfliktu paśla vybaraŭ sprabavała ŭstupić u pramy kantakt ź biełaruskim prezidentam».
«Tady z taho boku dla hetaha nie było stvorana mahčymaściaŭ, u hetym nie było zacikaŭlenaści. Bolš ja z hetaj nahody skazać nie mahu, ale razmova z Pucinym — heta razmova z tym, kaho vysłuchajuć u Minsku», — dadaŭ jon.
U žniŭni 2020 hoda Mierkiel, jak i prezident Francyi Emaniuel Makron byli hatovyja prapanavać svajo pasiarednictva dla vyrašeńnia hramadska-palityčnaha kryzisu ŭ Biełarusi, adnak u Minsku, jak havaryli insajdary, admovilisia navat padniać telefonnuju trubku.
U toj ža čas paśla sieryi razmoŭ Alaksandra Łukašenki i Uładzimira Pucina ŭłady Biełarusi pa palityčnych matyvach zatrymali bolš za 36 tysiač čałaviek, byli razhromlenyja amal usie niezaležnyja ŚMI i hramadskija arhanizacyi.
Minsk na siońnia maje krajnie składanyja adnosiny z čatyrma ź piaci krain-susiedak.
Maskva ŭ sieradu, z adnaho boku, zajaviła, što jeŭrapiejcy pavinny razmaŭlać z Alaksandram Łukašenkam naŭprost, ale, z druhoha boku, u čaćvier vusnami pres-sakratara Kramla zapeŭniła, što prykładaje ŭsie namahańni dla vyrašeńnia kryzisu «ŭ pastajannym kantakcie z Alaksandram Łukašenkam».
Jeŭrapiejcy ličać ciapierašni mihrancki kryzis absalutna štučnym, inśpiravanym Biełaruśsiu dla cisku na susiednija krainy. Bolšaść mihrantaŭ składajuć vychadcy ź Irakskaha Kurdystana, u jakim niama ni vajny, ni katastrofaŭ i jaki zastavaŭsia astraŭkom stabilnaści navat padčas zmahańnia Iraka z terarystyčnaj «Isłamskaj dziaržavaj».
Ciapier čytajuć
Zahinuŭ biełaruski dobraachvotnik Vasil «Dzir» Rapicki11
Kamientary