Kuźniacoŭ: Kałaps biełaruskaha režymu niepaźbiežny, kolki b hrošaj ni dała Maskva

— Učora my, narešcie, pačuli naŭprost: paśla refierendumu daterminovych prezidenckich vybaraŭ nie budzie, — piša Kuźniacoŭ. — Pačynajučy sa žniŭnia 2020 hoda i da apošniaha času hety momant adkryta nie prahavorvaŭsia.

Možna skazać, była intryha. Zrazumieła było, što pakidać kresła da 2025 hoda nichto jaŭna nie choča, adnak paralelna było bačna, što abstaviny (jak ličyłasia, cisk Rasii, jakaja nadyktavała takija ŭmovy ŭ razhar biełaruskich pratestaŭ) padšturchoŭvajuć i idzie lichamankavy pošuk varyjantaŭ.

U tym liku, hetym ža pošukam varyjantaŭ tłumačylisia i biaskoncyja «zaruby» z Zachadam, ź vidavočnaj metaj źviarnuć na siabie ŭvahu.

Što źmianiłasia i čamu ciapier razmovy ab daterminovym pakidańni nasiedžanaha miesca nie idzie?

Nasamreč usio zdajecca dastatkova prosta. Miarkujučy pa skupych paviedamleńniach pres-słužbaŭ, nastupnaj rezkaści Bajdena, navinach pra jak minimum paŭhadavuju zamarozku prajekta «Paŭnočny patok», Pucin z amierykanskim prezidentam padčas videakanfierencyi ahulnaj movy nie znajšli.

Amierykanski bok admoviŭsia prymać rasijski paradak dnia i, pa-pieršaje, asłablać padtrymku Kijeva, a pa-druhoje, prymušać jaho da vykanańnia Minskich pahadnieńniaŭ u rasijskaj traktoŭcy.

Miarkujučy pa ŭsim, u hetym była stratehičnaja meta Pucina — damahčysia ad Zachadu harantyj nieprychodu NATA va Ukrainu i taho, što jon nie budzie «hulać» na biełaruskim kirunku.

Uzamien Maskva mahła prapanavać deeskałacyju napružańnia ŭ rehijonie i sadziejničańnie transfarmacyi (z harantyjaj zachavańnia daminujučaha rasijskaha ŭpłyvu) u Biełarusi. U siońniašnich umovach, treba skazać, heta taksama častka deeskałacyi.

U vyniku, adzinyja harantyi, jakija ŭdałosia atrymać, — heta harantyi biesprecedentnych sankcyj i «darahoj cany» ŭ vypadku vajennaha ŭmiašańnia na Danbasie (i nie tolki). Pakolki meta dasiahnuta nie była, to «hulnia» praciahvajecca, a hałoŭny kozyr Rasii ŭ padobnych tarhach — rašeńnie prablem, joj ža stvoranych.

Takim čynam, napružanaja i niepradkazalnaja situacyja ŭ rehijonie budzie zachoŭvacca. Łukašenka zastajecca patrebien Maskvie.

Adsiul — źniešniaja zaspakojenaść u Minsku: vielmi padobna, što tema daterminovych vybaraŭ źniata z paradku dnia i možna časova rassłabicca, pahłyblajučysia ŭ čystki ciapier užo ŭłasnych šerahaŭ.

Dobra heta ci drenna? Nasamreč, nie tak i nie tak. My ž, urešcie, chočam bačyć siabie niezaležnaj dziaržavaj.

Nu a Rasii, častkaj palityki jakoj užo doŭhi čas (dziesiacihodździ, kali nie stahodździ) źjaŭlajucca sproby vybudoŭvańnia ŭsialakich sajuzaŭ z marhinalnymi i niedziejazdolnymi ŭ samastojnym farmacie režymami, daviadziecca, jak vodzicca, nieści peŭnyja vydatki.

Biełaruski bok, pad upłyvam novych raskładaŭ, dziubaj vyrašyŭ nie ščoŭkać i prosta «pa-haračamu» ŭžo zajaviŭ, što čakaje ad Maskvy 3,5 młrd. dalaraŭ. Nu, praŭda, sajuźnika treba padtrymlivać — bieź pierśpiektyvy viartańnia.

Pry hetym u krainie nabirajuć chod užo zhadanyja čystki, litaralna na ŭsich uzroŭniach, što pahražaje kančatkovym źniščeńniem nacyjanalnaj ekanomiki: kali pałovu zvolniać, a pałova zjedzie, karmić biełaruskich siłavikoŭ daviadziecca, znoŭ ža, rasijskim piensijanieram.

Pahroza Litvy spynić tranzit ź Biełarusi stvaryła pahrozu kamunikacyi «vialikaj» Rasii z Kalininhradskaj vobłaściu, što patrabuje ŭmiašańnia i rašeńnia. «Paŭnočny patok» zabłakavany. Usio heta — tolki pačatak prablem.

Pad hruzam nieabchodnaści vieści niepatrebnyja vojny, «chałodnuju vajnu» i karmić šmatlikich «sajuźnikaŭ» upaŭ navat zvyšmahutny SSSR. I, zdajecca, patrebnych urokaŭ z historyi ŭ Maskvie nichto nie vynies.

Biełaruski režym zastajecca bieznadziejnym pa vielmi prostych pryčynach: resursaŭ vielmi mała, cisk vielmi vysoki i prablemy hetyja nijak nie vyrašajucca, chutčej — paharšajucca. Kałaps adbudziecca tady, kali resursaŭ stanie nie chapać, kab strymlivać cisk.

$3,5 młrd. ad Maskvy — kropla ŭ mory ad taho, što jašče spatrebicca. Pazbaŭlacca ad «pasivaŭ» abo iści šlacham SSSR — heta prablema Rasii. Na Zachadzie heta razumiejuć, tamu i nie śpiašajucca. U Kramli, zdajecca, nie vielmi razumiejuć…

Saša Filipienka: «My ciapier zmahajemsia nie tolki z režymam Łukašenki, ale i z Rasijaj, jakaja staić za jaho śpinaj»

«Revalucyja — heta praces. Vynik zaležyć ad nas usich». Demakratyčnyja siły abmierkavali płan dziejańniaŭ na nastupny hod

• 0
• 0
• 0
• 0
• 0
• 0
• 0
• 0